Kallar eftir samstöðu matvöruframleiðenda

Helgi Vilhjálmsson, eigandi sælgætisgerðarinnar Góu, kallar eftir samstöðu allra matvöruframleiðenda og kaupmanna í stríðinu gegn verðbólgu á nýju ári en þetta kemur fram í fréttatilkynningu frá Helga.

Með þeim hætti vill hann safna liði og svara því ákafa kalli sem heyrist nú um stundir í öllu samfélaginu; að atvinnurekendur, verkalýðsfélög og allur almenningur verði að standa saman til að viðhalda kaupmætti og stöðugleika í efnahagslífi landsmanna.

„Ég kalla eftir kraftmiklum manni úr röðum atvinnurekenda til að fylkja okkur saman – og nú má enginn víkja af hólmi,“ segir Helgi.

Þessi kunni iðnrekandi er vanur að fara sínar eigin leiðir í baráttunni fyrir bættum hag almennings – og er þar skemmst að minnast kröfu hans um að lífeyrissjóðirnir hjálpi til við uppbyggingu hjúkrunarheimila fyrir aldrað fólk.

Nú horfir hann til alls almennings og brýnir fyrir kaupmönnum og öllum atvinnurekendum að láta ekki sitt eftir liggja í stríðinu gegn verðhækkunum:

„Þetta vildi ég gera strax árið 2009,“ segir Helgi, „en þá vildu fáir fylgja mér eftir,“ bætir hann við – og segir að vissulega hafi oft verið þörf fyrir aðgerðir af þessu tagi, en nú sé það beinlínis nauðsyn:

„Sjálfir höfum við ekki hækkað verð á okkar vörum frá því 2009 og ætlum að reyna að halda því áfram,“ segir Helgi í Góu – og heitir, sem fyrr segir, á alla kollega sína að grípa nú þegar til aðgerða:

„Þeir sem vilja vera með geta bæst í hópinn. Það þarf að stöðva verðbólguna – og það er einfaldlega í höndum okkar, sem framleiðum og seljum vöruna, að gera það í samvinnu við neytendur og launþega. Það er kominn tími til að standa saman,“ segir Helgi í Góu, sem staðið hefur vaktina í sínu fyrirtæki í 45 ár.