Högnuðust um 64,6 milljarða og greiða 21 milljarð í arð

Skattgreiðslur viðskiptabankanna stóru, Landsbankans, Íslandsbanka og Arion banka, jukust um 70,6 prósent á milli áranna 2012 og 2013, samkvæmt því sem lesa má úr nýbirtum ársreikningum þeirra. Allir kvarta þeir undan auknum opinberum álögum, sem setji mark sitt á reksturinn.

Þannig dregur úr hagnaði á milli ára hjá Arion banka og Íslandsbanka, en báðir birtu uppgjör skömmu fyrir mánaðamót.

Hagnaður Íslandsbanka dróst saman um eitt og hálft prósent, fór úr 23,4 milljörðum í 23,1 milljarða króna, en hagnaður Arion banka um fjórðung, fór úr 17,1 milljarði í 12,7 milljarða.

Einungis Landsbankinn eykur hagnað sinn á milli ára, fer úr 25,4 milljörðum króna í 28,8 milljarða, sem er 13,4 prósenta aukning á milli ára.

Heildareignir jukust hjá öllum bönkunum. Samtals áttu þeir í lok síðasta árs sem svarar 2.956,4 milljörðum króna, en það er aukning um 5,3 prósent frá fyrra ári þegar þeir áttu sem svarar 2.808,5 milljörðum króna.

Bankarnir leggja allir til að hluta hagnaðar síðasta árs verði varið til greiðslu arðs, en mismikils þó eftir bönkum.

Íslandsbanki leggur til lægsta hlutfallið af hagnaði, 40 prósent, sem samsvarar því að bankinn greiði hluthöfum sínum 9,2 milljarða króna í arð.

Arion banki leggur til að arðgreiðslan nemi 60 prósentum af hagnaði og verði 7,6 milljarðar króna. Báðir bankarnir eru að stærstum hluta í eigu kröfuhafa. Ríkið á þó fimm prósenta hlut í Íslandsbanka og fær því 461,4 milljónir króna hlutdeild af arðgreiðslu bankans.

Arion banki er svo aftur að 13 prósentum í eigu ríkisins sem því fær 988 milljóna króna hlut.

Landsbankinn, sem núna leggur til greiðslu arðs af 70 prósentum hagnaðar síðasta árs, eða sem svarar 20,1 milljarði króna, er hins vegar að stærstum hluta í eigu ríkisins.

Bankasýslan fer með 97,08 prósenta eignarhlut í bankanum og því renna rúmir 19,5 milljarðar af arðgreiðslunni til ríkisins. Alls fær íslenska ríkið því rétt tæpan 21 milljarð króna í arð af eign sinni í viðskiptabönkunum þremur.

Á kynningarfundi um uppgjör Landsbankans í gærmorgun, sem var síðastur bankanna til að birta uppgjör sitt í byrjun þessarar viku, kom fram í máli Hreiðars Bjarnasonar, framkvæmdastjóra fjármála hjá bankanum, að gangi arðgreiðslan eftir á aðalfundi muni hún hafa áhrif til lækkunar á eigin fé bankans sem nemi rúmum tveimur prósentum.

„En eiginfjárstaðan er áfram gríðarlega sterk verði tillagan samþykkt,“ bætti hann við. Í árslok stóð eiginfjárhlutfall bankans í 26,7 prósentum.

Laun hækkuðu hjá öllum bankastjórum

Breytingar til hækkunar urðu á launakjörum allra yfirmanna í viðskiptabönkunum þremur milli áranna 2012 og 2013 að því er lesa má út úr ársskýrslum bankanna sem birtar hafa verið síðustu daga.

Af bankastjórnunum þremur er Höskuldur Ólafsson, bankastjóri Arion banka, með hæst mánaðarlaun, 4,2 milljónir króna. Laun hans hækkuðu um 13,9 prósent á milli ára, en á fyrra ári námu mánaðarlaun hans 3,7 milljónum.

Næsthæst laun er svo Birna Einarsdóttir, bankastjóri Íslandsbanka, með, eða sem svarar rúmum þremur milljónum króna. Séu árangurstengdar greiðslur teknar með má svo hækka mánaðartekjur hennar í fyrra í 3,6 milljónir króna. Hækkun milli ára nemur 15,6 prósentum og 27 prósentum ef árangurstengdu greiðslurnar eru teknar með.

Hlutfallslega hækka hins vegar mest á milli ára laun Steinþórs Pálssonar, bankastjóra Landsbankans, eða um 32,5 prósent. Hann er engu að síður með umtalsvert lægri laun en kollegar hans í hinum bönkunum. Launagreiðslur (með lífeyrissjóðsgreiðslum) til hans jafngilda mánaðarlaunum upp á rúmlega 1,8 milljónir króna í fyrra, en árið áður námu laun hans tæpum fjórtán hundruð þúsundum á mánuði.