Laugavegurinn á lista yfir bestu verslunargötur heims

„Kannski ekki stærsta verslunargata heims, eða mikið af fólki þar að finna, en þessi verslunargata í miðbæ Reykjavíkur hefur upp á margt að bjóða. Þar má finna fínustu vörur á Íslandi, og hún er jafnframt ein elsta verslunargata landsins. Líkt og aðrar verslunargötur sem finna má á listanum, eru þar margar einkareknar verslanir og dýrustu merkin frá öllum heimshornum,“ segir í úttekt heimasíðunnar 10mosttoday.

Heimasíðan tekur saman topp-10 lista yfir hið ýmsa, arkítektúr, verkfræði, náttúru, ferðamennsku og svo mætti lengi telja, en hún útnefnir Laugaveginn í tíunda sæti yfir bestu verslunargötur í heimi.

Aðrar verslunargötur sem finna má á listanum eru Fifth Avenue í New York, sem trónir á toppi listans, Bond Street í London, Rodeo Drive í Beverley Hills og Avenue Montaigne í París, svo einhverjar séu nefndar, og því ljóst að það er ekki leiðum að líkjast.