Aukið jafnrétti – Aukin hagsæld

UN Women á Íslandi, Festa – miðstöð um samfélagsábyrgð og Samtök atvinnulífsins bjóða til opinnar ráðstefnu á morgun klukkan 8.30 (skráning hefst 8.10) um stöðu og þróun jafnréttismála á atvinnumarkaði í samstarfi við Jafnréttisstofu undir yfirskriftinni „Aukið jafnrétti – Aukin hagsæld.“ Ráðstefnan verður haldin á Hilton Reykjavík Nordica. Styrktaraðili ráðstefnunnar er Actavis á Íslandi.

Fjallað verður um mikilvægi þess að fyrirtæki setji jafnréttismál á oddinn út frá viðskiptalegum forsendum og samfélagsábyrgð. Rætt verður um nauðsyn þess að hafa blandaðar stjórnir og stjórnendur í fyrirtækjum bæði út frá jafnréttissjónarmiðum og af þeirri einföldu ástæðu að teknar eru betri ákvarðanir fyrirtækjum til heilla. Jafnframt verður rætt um Jafnréttissáttmála UN Women og UN Global Compact (WEP), stefnu og innleiðingu. Hluti af aðgangseyri ráðstefnunnar rennur til UN Women í þágu valdeflingar kvenna á atvinnumarkaði.

Gena Lovett, Global Chief Diversity Officer hjá Alcoa, Kristin Hetle, framkvæmdastýra hjá UN Women, Guðbjörg Edda Eggertsdóttir, forstjóri Actavis á Íslandi ásamt Sigurborgu Arnardóttur formanni Festu og Þorsteini Víglundssyni framkvæmdastjóra SA flytja erindi á ráðstefnunni.

Ragnheiður Elín Árnadóttir iðnaðar-og viðskiptaráðherra mun heiðra eitt íslenskt fyrirtæki sem hefur haft jafnrétti að leiðarljósi í sínu starfi  með Hvatningarverðlaunum jafnréttismála og hvetja þannig önnur fyrirtæki til þess að gera slíkt hið sama. Auk þess munu þrjú íslensk fyrirtæki og eitt alþjóðlegt fyrirtæki skrifa undir Jafnréttissáttmála UN Women og Global Compact.

Ráðstefnan er opin öllum. Skráning fer fram á www.sa.is

Verð: 9.800 krónur fyrir hádegi (innifalið í verði er léttur morgunverður) en 15.900 fyrir allan daginn (innifalið í verði er hádegisverður og léttar veitingar yfir daginn)