Farþegum í millilandaflugi fjölgar hjá Icelandair

Icelandair flutti í ágúst síðastliðnum um 354 þúsund farþega í millilandaflugi og voru þeir 18 prósentum fleiri en í ágúst á síðasta ári. Í tilkynningu frá félaginu segir einnig að framboðsaukning á milli ára hafi numið 19 prósentum og sætanýting var 86,2 prósent samanborið við 85,5 prósent  á sama tíma í fyrra.

Mesta fjölgun var á Norður Atlantshafsmarkaðinum eða rúm 23 prósent og voru þeir um 55 prósent af heildarfarþegafjölda félagsins í millilandaflugi í ágúst.Þá segir að farþegar í innanlandsflugi og Grænlandsflugi hafi verið 32 þúsund í ágúst og fækkaði þeim um 2 prósent á milli ára.

Fjöldi seldra gistinótta á hótelum félagsins jókst um 3,9 prósent milli ára og herbergjanýting var 88,3 prósent samanborið við 88,2 prósent í ágúst í fyrra.