Mikill hasar í herbúðum DV

Samkvæmt heimildum Vísis er mikill hiti á starfsmannafundi DV þar sem nýr ritstjóri, Hallgrímur Thorsteinsson, og nýr stjórnarformaður, Þorsteinn Guðnason, funda með ritstjórn.

Eftir því sem Vísir kemst næst eru starfsmenn ekki sáttir við þá gagnrýni sem sett hefur verið fram á fagleg störf Reynis Traustasonar. Með ásökunum um að hann hafi látið stjórnast í störfum sínum af utanaðkomandi öflum sé í raun verið að draga heilindi allra á ritsjórninni í efa.

Það gæti því reynst þraut þyngri fyrir Hallgrím Thorsteinsson að ávinna sér traust ritstjórnarinnar en tveir blaðamenn hafa nú þegar sagt upp störfum.