Reitir högnuðust um 7,8 milljarða króna í fyrra

Mikill viðsnúningur varð á rekstri fasteignafélagsins Reita samkvæmt nýbirtum ársreikningi síðasta árs. Félagið hagnaðist á árunu 2013 um tæpa 7,8 milljarða króna, en árið áður var tæplega 6,6 milljarða tap á félaginu.

Fram kemur í tilkynningu um uppgjör félagsins að eignasafn þess hafi verið endurmetið samkvæmt alþjóðlegum reikningsskilastöðlum á árinu og að hækkunin nemi tæpum 8,7 milljörðum króna, samanborði við matslækkun að fjárhæð 5,9 milljarðar árið 2012.

Fram kemur að rekstrarafkoma Reita fyrir fjármagnsliði og matsbreytingu fjárfestingareigna hafi verið í takti við áætlanir í fyrra.

„Rekstrartekjur félagsins árið 2013 námu 8.168 milljónum króna. samanborið við 7.887 milljónir króna árið 2012. Rekstrarhagnaður af reglulegri starfsemi (NOI) var 5.869 milljónir króna árið 2013 samanborið við 5.693 milljónir króna árið 2012,“ segir í tilkynningunni.

Félagið stefnir að skráningu í Kauphöllina á seinni hluta þessa ár. Félagið ætlaði að skrá sig á síðasta ári, en þær áætlanir eru sagðar hafa tafist þar sem ekki hafi fengist niðurstaða í viðræður við Seðlabanka Íslands og Hypothekenbank Frankfurt vegna lánaskuldbindinga félagsins erlendis.

„Vonir standa til þess að úr greiðist innan tíðar, en skjalfest efnislegt samkomulag með Reitum, Hypothekenbank og Seðlabankanum um inntak sáttar til lausnar á málinu hefur legið fyrir frá því í janúar,“ segir í tilkynningunni. 

Stærstu eigendur Reita eru Eignabjarg ehf. með 42,7 prósenta hlut, Landsbankinn hf. með 29,6 prósenta hlut, og Þrotabú Landic Property með 15,9 prósenta hlut.