Hagstofan spáir 2,7 prósenta hagvexti í ár

Hagvöxtur er talinn verða 2,7 prósent á þessu ári en þrjú prósent á því næsta.

Verðbólgan verður 2,6 prósent í ár og rúmlega þrjú prósent á næsta og þarnæsta ári. Þetta kemur fram í nýrri þjóðhagspá Hagstofunnar.

Spáð er 3,5 prósent einkaneyslu á þessu ári og fjárfesting aukist um 9,2 prósent. Reiknað er með að einkaneyslan aukist um 3,3 prósent á næsta ári og nærri 3 prósent  til ársins 2018. Þá er talið að fjárfesting muni aukast um 18,2 prósent árið 2015 og fari vaxandi ef frá er talið árið 2017.

Hagstofan segir að áætlun ríkisstjórnarinnar um lækkun verðtryggðra íbúðalána ásamt aukningu ráðstöfunartekna, sem rekja megi meðal annars til styrkingar vinnumarkaðar styðji við einkaneyslu á spátímanum.

Spáð er 2,6 prósent verðbólgu árið 2014, 3,4 prósent árið 2015 og 3,1 prósent árið 2016, en undir þremur prósentum eftir það.

Kjarasamningum er að mestu lokið á almennum vinnumarkaði en lausir kjarasamningar opinberra starfsmenn viðhalda nokkurri óvissu um launa- og verðlagsþróun.