Nýr framkvæmdastjóri Framtakssjóðs Íslands

Herdís Dröfn Fjeldsted hefur verið ráðin framkvæmdastjóri Framtakssjóðs Íslands (FSÍ) og tekur við af Brynjólfi Bjarnasyni þann 1. apríl n.k. en hann óskaði nýlega eftir að láta af störfum.

Herdís hefur verið fjárfestingastjóri hjá FSÍ frá árinu 2010 og hefur viðamikla reynslu úr sínum störfum af fjárfestingum og umbreytingaverkefnum. Herdís er með meistarapróf í fjármálum fyrirtækja frá Háskólanum í Reykjavík og viðskiptafræðipróf af alþjóðamarkaðssviði. Hún hefur setið í stjórnum fjölmargra fyrirtækja m.a. sem stjórnarformaður Icelandic, varaformaður stjórnar Promens í stjórn Icelandair Group og Invent Farma.

„Herdís er afar vel undir það búin að leiða þau verkefni sem framundan eru hjá Framtakssjóðnum. Hún hefur mikla reynslu af starfsemi og fjárfestingum FSÍ. Framtakssjóðurinn á nú eignarhluti í fimm fyrirtækjum og verkefnið framundan er að vinna með stjórnendum og starfsfólki að því að þróa starfsemi þeirra og rekstur, skrá þau á hlutabréfamarkað eða selja þau. Einnig er verið að skoða ný áhugaverð fjárfestingartækifæri sem falla að stefnu sjóðsins,“ segir Þorkell Sigurlaugsson, stjórnarformaður FSÍ í tilkynningu frá sjóðnum.

Heildareignir FSÍ eru um 36 milljarðar króna og eiginfjárhlutfall 90%.