Tvöfalt fleiri bjórtegundir en fyrir sjö árum

Brjánn Jónasson skrifar 15. janúar 2014 06:30

Alls voru 321 vörunúmer af bjór til sölu hjá vínbúðum ÁTVR á síðasta ári. Sama tegund getur verið á fleiri en einu númeri ef umbúðirnar eru mismunandi svo bjórtegundirnar eru færri, en úrvalið er samt mikið. Fréttablaðið/GVA

Íslendingar geta nú valið úr næstum tvöfalt fleiri tegundum af bjór í vínbúðum ÁTVR en fyrir sjö árum síðan. Litlar breytingar hafa orðið á magni bjórs sem seldur er, en söluhæstu tegundirnar tapa markaðshlutdeild.

Samkvæmt upplýsingum frá ÁTVR voru 321 vörunúmer af bjór til sölu í verslununum í fyrra. Sama bjórtegund getur verið á fleiri en einu vörunúmeri sé hún seld í mismunandi umbúðum. Árið 2007 voru vörunúmer í sölu 165. Aukningin er 95 prósent.

Heldur hefur dregið úr bjórsölu á þessum sjö árum. Árið 2007 seldust 15,8 milljónir lítra, en 14,5 milljónir lítra í fyrra.

„Ég held að smekkur Íslendinga hafi þroskast, og það hafi gerst dálítið hratt,“ segir Stefán Pálsson bjóráhugamaður.

Hann segir líklegt að árstíðarbundnir bjórar fari langt með að skýra þennan fjölda bjórtegunda sem standa Íslendingum til boða. „Það er til dæmis mjög spennandi að sjá hvað jólabjórarnir hafa sprungið út á stuttum tíma. Það hefur myndast einhverskonar múgsefjun í kringum hann.“

Stefán bendir á að jólabjór, þorrabjór og páskabjór komi í sölu á tilteknum dögum, og þó það megi ekki auglýsa þá fái þeir gjarnan umfjöllun í fjölmiðlum sem auki á áhuga almennings. Þá fái smærri framleiðendur auðveldari aðgang að verslunum ÁTVR með slíka bjóra en aðrar nýjar tegundir.

„Fullt af fólki sem kaupir sjaldan bjór, eða kaupir einfalda ljósa lagerbjóra, hleypur til og prófar flóknari hluti þegar þessir bjórar koma í sölu,“ segir Stefán.

Á síðustu sjö árum hefur hlutfall 30 söluhæstu vörunúmera í bjór dregist saman. Árið 2007 var 81 prósent af bjórsölu ÁTVR í þrjátíu söluhæstu vörunúmerunum. Í fyrra var hlutfallið komið niður í 75 prósent.

„Þetta segir okkur að obbinn af sölunni eru fáar tegundir sem eru í sölu allt árið, þó það komi kúfar,“ segir Stefán.

Flytja frekar inn erlendan gæðabjór

Aðeins tvær af tíu vinsælustu bjórtegundunum á síðasta ári eru innfluttar. Faxe premium er sjötti vinsælasti bjórinn, og Hollandia vermir tíunda sætið. Íslenskir lagerbjórar raða sér í hin átta sætin á topp tíu listanum.

Stefán segir að eftir hrun hafi innflutningur á stórum erlendum bjórtegundum dregist verulega saman. Innflutningurinn hafi breyst, nú sé meira um að flutt sé inn lítið magn af erlendum gæðabjór.

Vinsælustu bjórarnir 2013