Keypti þúsund nýja fólksbíla árið 2013

„Við erum stærsta bílaleiga landsins og þurfum að endurnýja flotann um hér um bil þúsund bíla á ári ef við ætlum að halda sjó í samkeppninni,“ segir Bergþór Karlsson, framkvæmdastjóri Bílaleigu Akureyrar.

Fyrirtækið keypti um eitt þúsund nýja fólksbíla á síðasta ári eða um fjórtán prósent af heildarsölu nýrra fólksbíla. Á sama tíma dróst sala á nýjum fólksbílum saman um átta prósent miðað við árið 2012. 

„Hins vegar drógum við úr bílakaupum á síðasta ári miðað við árið á undan því bílaleigur lentu í óhagkvæmara rekstrarumhverfi en árið áður þegar gjöld sem við greiðum til hins opinbera hækkuðu,“ segir Bergþór.

Bílaleigan á um þrjú þúsund bíla yfir háannatímann á sumrin, eða um fjórðung allra bílaleigubíla í landinu. Krafan um endurnýjun þýðir að fjöldi bílaleigubíla fer í sölu á almennum markaði á hverju ári. 

Özur Lárusson, framkvæmdastjóri Bílgreinasambandsins, segir þessa þróun óæskilega því endurnýjun íslenska bílaflotans fer nú að stórum hluta í gegnum bílaleigurnar. Hann segir sölu á nýjum fólksbílum til bílaleiga hafa numið um fjörtíu prósentum af heildarsölu síðasta árs. Hlutfallið var enn hærra árið 2010, eða um sextíu prósent.

„Það hefur verið stöðugur uppgangur í ferðaþjónustunni á síðustu árum og bílaleigurnar hafa blásið út vegna aukinnar eftirspurnar og það er gott mál. Á sama tíma hefur fjölskyldubíllinn setið eftir og flotinn orðið einsleitari því margar bílaleigur nota bíla frá ákveðnum framleiðendum,“ segir Özur. 

„Við myndum eðlilega vilja sjá hraðari endurnýjun á bílaflotanum í gegnum hinn almenna neytanda en ekki að stórum hluta í gegnum bílaleigurnar eins og þetta hefur verið síðan 2010.“

Özur segir Bílgreinasambandið spá aukinni bílasölu á þessu ári og nefnir fimmtán prósenta aukningu í sölu á fólksbílum. 

„Við teljum að þörfin sé brýn því meðalaldur fólksbílaflotans hér á landi er tólf ár á meðan hann er 8,3 ár innan Evrópusambandsins. Á meðan sitjum við eftir með óöruggari bíla sem menga meira þar sem bílar sem voru framleiddir fyrir aldamót eyða um fjörtíu prósent meira eldsneyti en bílar sömu gerðar gera í dag.“