Haru Holding kaupir Bláfugl

Haru Holding ehf., félag tengt Air Atlanta, hefur keypt allt hlutafé í Bláfugli ehf. af SPW ehf., dótturfélagi eignarhaldsfélagsins Miðengi sem er í eigu Íslandsbanka. 

Salan átti sér nokkuð langan aðdraganda því opið söluferli á Bláfugli hófst þann 22.febrúar 2012. Það var samkvæmt fréttatilkynningu Miðengis opið öllum áhugasömum fjárfestum sem uppfylltu skilyrði þess að geta talist fagfjárfestar samkvæmt lögum nr. 108/2007 um verðbréfaviðskipti.

„Samningar eru gerðir með fyrirvara um endanlegt samþykki Samkeppniseftirlitsins," segir í tilkynningunni. 



Uppfært kl 12:45:



Haru Holding hefur áframselt allt hlutafé í Bláfugli ehf til nýstofnaðs félags BB Holding ehf. sem er í eigu Haru Holding ehf og Steins Loga Björnssonar og á hvor aðili um sig helmings hlut í félaginu. Þetta kemur fram í fréttatilkynningu.

Þar segir að Steinn Logi Björnsson muni gegna hlutverki stjórnarformanns í bæði BB Holding ehf og Bláfugli ehf.

„Bláfugl ehf verður áfram rekið sem sjálfstætt Íslenskt flugfélag á sama grunni og verið hefur. Flugfloti félagsins samanstendur af fimm Boeing 737 fraktvélum."