Fjórðungur starfsmanna íslenskra fyrirtækja er óvirkur

Í nýrri könnun Dale Carnegie og MMR kemur fram að  allt að 25% starfsmanna íslenskra fyrirtækja eru óvirkir í starfi. Slíkir starfsmenn eru óánægðir, sjá fyrirtækið ekki fyrir sér sem framtíðar vinnustað, skapa úlfúð og finna sig ekki í starfi.

Í tilkynningu segir að þetta komi fram í könnuninni „Ísland í vinnunni“ sem er gagnagrunnur sem geymir upplýsingar um viðhorf starfsmanna fyrirtækja og stofnana til innra og ytra starfsumhverfis síns.  Könnunin nær til um 4.000 einstaklinga á vinnumarkaði.

Þá kemur jafnframt fram að rannsóknir sýni að þetta komi með beinum hætti fram í arði fyrirtækja og kosti þau háar fjárhæðir árlega.

Óánægðir fjölmiðlamenn

Þegar horft er til einstakra starfsstétta leiðir könnunin í ljós að einna óánægðastir eru starfsmenn fjölmiðlafyrirtækja en þar eru rétt tæplega 30% óvirkir og stór hluti vill skipta um starfsvettvang. Mest ánægja er hins vegar innan fjármálageirans en þar bera 7 af hverjum 10 starfsmönnum mikið traust til yfirmanna sinna.

Upplýsingar úr könnun sem þessari geta nýst fyrirtækjum afar vel enda sýnir rannsókn MSW Research fyrir DC&A að fyrirtæki með hátt hlutfall virkra starfsmanna sýna að meðaltali 202% meiri hagnað og halda betur í starfsfólk.

Þeir þættir sem teljast hafa mest áhrif á virkni eru samband starfsmanns og næsta fyrirmanns, trú á yfirstjórnendur fyrirtækisins og hvort starfsmaðurinn sé stoltur af því að vinna fyrir fyrirtækið.