IFS greining spáir óbreyttum stýrivöxtum

IFS greining telur að Seðlabankinn haldi vöxtum óbreyttum vegna óvissu um áhrif gengisstyrkingar, efndir kosningaloforða og launaþróunar. Virkir raunstýrivextir, ef miðað er við 12 mánaða verðbólgu, eru nú um 2,09% en raunstýrivextir m.v. veðlánavexti Seðlabankans eru um 2,72%.

Í áliti IFS segir að búast megi við hækkun raunvaxta í kjölfar hjaðnandi verðbólgu í sumar sem styður við óbreytta vexti og dregur úr slaka peningastefnunnar.

"Við ákvörðun stýrivaxta verður litið til verðbólguþróun síðustu mánaða ásamt verðbólguhorfum næstu mánaða. Krónan hefur styrkst um 7,5% frá síðasta fundi og verðbólgan hefur hjaðnað hratt í átt að markmiði," segir í álitinu.

"Hagvaxtarspá Hagstofu Íslands hefur lækkað frá því í haust. Seðlabankinn mun birta ritið Peningamál 2013/2 á sama tíma og ákvörðun peningastefnunefndar og gerum við ráð fyrir að í spá Seðlabankans komi fram hægari vöxtur einkaneyslu og lítilleg lækkun á hagvaxtarspá. Á næstu mánuðum gætu efndir kosningaloforða og komandi kjarasamningar leitt til hærri verðbólgu. í síðustu tveimur yfirlýsingum og fundargerðum peningastefnunefndar er svipaður tónn í sambandi við framtíðarhorfur fyrir þetta ár."

Næsti vaxtaákvörðun peningastefnunefndar Seðlabankans verður þann 15. maí.