Yfir áttatíuföld umfram eftirspurn eftir hlutum í TM

Gífurlegur áhugi var á útboðinu í hluti Tryggingamiðstöðinni í vikunni. Alls bárust um 7 þúsund áskriftir að heildarandvirði 357 milljarðar króna í  útboði á hlutum í fyrirtækinu. Þetta er yfir áttatíuföld umframeftirspurn miðað við útboðsverðið.

Stoðir buðu 28,7% hlut í TM til sölu á verðbilinu 17,75 - 20,10 krónur á hlut, segir í tilkynningu vegna útboðsins. Stjórn Stoða hefur ákveðið að útboðsgengið verði í efstu mörkum, 20,10 krónur á hlut. Söluandvirðið nemur 4,4 milljörðum króna á útboðsgengi. Enginn hluthafa TM mun eiga yfir 10% eignarhlut.

Í áskriftarhluta útboðsins, þar sem tekið var við áskriftum frá 100.000 krónum til 49.999.999 króna, bárust áskriftir fyrir samtals 22 milljarða króna. Í ljósi mikillar þátttöku hefur hámarksfjárhæð í þessum hluta útboðsins verið ákveðin 452.250 krónur. Áskriftir upp að þeirri fjárhæð verða ekki skertar.

Í þeim hluta útboðsins þar sem tekið var við áskriftum að fjárhæð að lágmarki 50 milljónir króna bárust áskriftir fyrir samtals 335 milljarða króna. Tryggð er lágmarksúthlutun í þessum hluta að fjárhæð 452.250 kr. en skerðing umfram lágmarksúthlutun er ákvörðuð hlutfallslega, þó þannig að hæsta einstaka úthlutun nemur um 5,8 milljónum króna.



Fyrsti dagur á markaði verður 7. maí

Gjalddagi og eindagi greiðsluseðla vegna útboðsins er 3. maí 2013 og verða hlutir í TM afhentir kaupendum 7. maí 2013. Gert er ráð fyrir að fyrsti viðskiptadagur með hluti TM á Aðalmarkaði Kauphallarinnar verði 8. maí 2013, en Kauphöllin mun tilkynna um fyrsta viðskiptadag með minnst eins viðskiptadags fyrirvara. Í viðhengi er bráðabirgðahluthafalisti TM að loknu útboði.

„Mikil þátttaka í hlutafjárútboði TM er okkur að sjálfsögðu ánægjuefni. Markmið Stoða með útboðinu hafa gengið eftir, bæði hvað varðar verð og dreifingu hlutafjár. Stoðir hafa unnið að sölu hlutafjár TM í á annað ár og hafa nú selt samtals um 95% hlutafjár til breiðs hóps einka- og fagfjárfesta," segir Júlíus Þorfinnsson, framkvæmdastjóri Stoða í tilkynningunni.

„Hlutafjárútboðið og skráning í Kauphöllina markar mikilvæg tímamót fyrir TM. Markmið TM er að verða hornsteinn á íslenskum hlutabréfamarkaði og þess vegna er það ánægjulegt að sjá hve fjölmennur hópur nýrra hluthafa kemur nú að félaginu," segir Sigurður Viðarsson, forstjóri TM.