Aðrir færari um að reka heilbrigðisþjónustuna en ríkið

Heilbrigðisráðherra horfir til þess að færa rekstur heilsugæslunnar frá ríkinu og til annarra sem eru færari um að annast reksturinn. Hann segir Íslendinga eiga tvo kosti í heilbrigðismálum; að þrengja meira að þjónustunni eða að hlúa að grunnstoðunum og forgangsraða fjármunum ríkissjóðs.

Kristján Þór Júlíusson heilbrigðisráðherra var gestur Sigurjóns M. Egilssonar í þættinum Sprengisandi á Bylgjunni í morgun. Þar ræddu þeir meðal annars einkavæðingu heilbrigðiskerfisins og sagði Kristján Þór að það væri möguleiki að gefa kost á fleiri rekstrarformum heilsugæslunnar en að ríkið reki hana.

„Það er ýmislegt annað í boði heldur en það að ríkissjóðurinn, ráðuneytið, standi í rekstri. Ég er þeirrar skoðunar að við eigum frekar að horfa til þess að ráðuneytið sé stefnumótandi á grunni löggjafar sem Alþingi hefur sett og síðan eru aðrir færari um að annast rekstur en ráðuneytin sjálf," sagðir Kristján Þór. Hann segir að endurskipulagning á heilbrigðiskerfinu sé nauðsynleg.

„Megin atriðið er þetta að miða við stöðuna sem við erum í með garminn ríkissjóð, 30 milljarða gat, þá er alveg klárt mál að við verðum einhvern veginn að reyna að vinna með þeim hætti að við fáum meiri þjónustu eða getum viðhaldið sama þjónustustigi fyrir sama fé."

Hann segir Íslendinga eiga tvo kosti í heilbrigðismálum, annar sé að ganga áfram á sömu braut og þrengja meira að þjónustunni sem muni skerða lífsgæði Íslendinga almennt.

„Ef við þurfum að fara að ganga harkalega inn í þennan málaflokk er það mitt mat að við getum ekki gert það með almennum flötum niðurskurði. Við eigum þá enga aðra kosti en að fara að forgangsraða verkefnum í heilbrigðisþjónustunni og það myndi þá vera fyrsta verk að loka fyrir tiltekna þjónustuþætti.

Hinn kosturinn er sá að hlúa að þessum grunnstoðum og koma í veg fyrir það að við þurfum að ganga þrautaveginn lengra. Það þýðir að við verðum að forgangsraða þessum takmörkuðu fjármunum sem í ríkissjóðinn koma hverju sinni með öðrum hætti en við höfum verið að gera á undanförnum árum," sagði Kristján Þór Júlíusson heilbrigðisráðherra.