Íslensk lög verja föllnu bankana í Evrópu

Evrópudómstóllinn staðfesti í dag að að íslensk lög sem banna málshöfðun gegn fjármálafyrirtækjum í slitameðferð gildi einnig í Evrópusambandinu.

Eftir að Landsbankinn hrundi ásamt Glitni og Kaupþingi í lok árs 2008 voru sett lög sem bönnuðu lögsóknir gegn fjármálafyrirtækjum í greiðslustöðvun. Tveir kröfuhafar í franskt dótturfélag Landsbankans, Kepler Securities, höfðuðu mál til að innheimta kröfur sínar og eftir það leitaði Hæstiréttur Frakklands í einkamálum eftir forúrskurði Evrópudómstólsins í málinu.

Evrópudómstóllinn briti úrskurð sinn í dag og staðfestir að íslensk lög frá nóvember 2008 sem banna lögsóknir gegn fjármálafyrirtækjum í greiðslustöðvun og stöðva mál sem þegar voru hafin sem og íslensk lög frá apríl 2009 þar sem fjármálafyrirtækin voru sett í hefðbundna slitameðferð gilda einnig á Evrópska efnahagssvæðinu.

Franskir fjárfestar hafa reynt að endurheimta innistæður sínar í gamla Landsbankanum og samkvæmt þessum úrskurði þurfa þeir að bíða eftir slitum bankans til að fá kröfur sínar greiddar eða þangað til slitastjórn bankans greiðir út kröfur vegna innistæðna.