Ætla að klára mestallan endurreikning fyrir áramót

Landsbankinn hefur nú hafið endurreikning á meginþorra ólögmætra gengistryggðra lána. Þetta kemur fram í tilkynningu frá bankanum í gær.

Landsbankinn var eini stóri bankinn sem enn var ekki byrjaður að endurreikna lánin. Þar á bæ var borið við réttaróvissu, þar til dómur féll í Hæstarétti í lok maí í máli Plastiðjunnar gegn bankanum.

Um tugi þúsunda lána er að ræða og verða þau endurreiknuð í áföngum. Í tilkynningunni segir að innan bankans sé vonast til að hægt verði að ljúka endurreikningum að mestu fyrir áramót.

Gert í nokkrum áföngum

Bankinn segir að endurreikningurinn muni fara fram í þremur skrefum.

Útreikningar vegna leiðréttingar annarra lána en fasteigna- og bílalána verði birtir strax í þessum mánuði.

Fyrstu endurútreikningar á bílalánum verði síðan birtir viðskiptavinum í byrjun júlí.

Það verði svo „innan tíðar“ sem bankinn muni hefjast handa við leiðréttingu fyrirtækjalána.