Nýr sæstrengur til Eyja

Lagningu tæplega 13 kílómetra langs sæstrengs milli lands og Eyja, Vestmannaeyjastrengs 3, lauk síðdegis á föstudag. Stefnt er að því að ljúka lagningu jarðstrengja að sæstrengnum á Landeyjasandi og í Vestmannaeyjum á næstu vikum og standa vonir til þess að tengivinnu verði lokið í ágústmánuði, að því er segir í tilkynningu frá Landsneti.

Til stóð að leggja strenginn í byrjun júlí en fresta þurfti framkvæmdum vegna veðurs. Á þriðjudaginn var byrjað á því að koma strengnum á land í Landeyjafjöru úr kapalskipinu Pleijel og tók sú vinna hátt í sólarhring. Verkið reyndist erfiðara en búist var við vegna hliðarstrauma og brims. Meðal annars hvolfdi bát í fjöruborðinu í þeim atgangi og var einn maður sendur á sjúkrahús til aðhlynningar. Hann reyndist sem betur fer ómeiddur.

Fjarstýrður kafbátur var notaður til að leggja niður sæstrenginn og er það mál manna sem að komu að vel hafi tekist til, að því er segir í tilkynningu. Mestu hindranirnar á botninum voru næst Eyjum.

Þetta er þriðji sæstrengurinn sem lagður er til Vestmannaeyja og leysir hann af hólmi Vestmannaeyjastreng 2 sem er illa farinn og ótraustur. Til að byrja með verður nýi strengurinn tengdur á 33 kV spennu en hann getur flutt allt að 66 kV spennu og því mögulegt að auka rafmagnsflutninga töluvert til Eyja þegar úrbætur hafa verið gerið á spennivirkjum í Eyjum og við Rimakot.

Áætlaður heildarkostnaður Landsnets við lagningu Vestmannaeyjastrengs 3 er um 1,6 milljarðar króna.