Hreinar eignir nema tæpum 1400 milljörðum

Hreinar fjáreignir heimila og félagasamtaka, það er eignir umfram skuldir, jukust um 7,5% á milli 2010 og 2011 og stóðu í 1.388 milljörðum króna í árslok 2011. Fjáreignir heimila og félagasamtaka námu 3.080 milljörðum króna í lok þess árs og voru fjárskuldbindingar þeirra 1.692 milljarðar króna á sama tíma.

Sem hlutfall af landsframleiðslu hafa fjáreignir aukist hægt og bítandi eftir hrun bankanna árið 2008 og voru 85,1% í lok árs 2011. Fjáreignir fyrirtækja annarra en fjármálafyrirtækja jukust um 7,4% á milli 2010 og 2011 á sama tíma og fjárskuldbindingar jukust um 4,5%. Skuldir fyrirtækja umfram eignir voru 2.692 milljarðar króna í lok árs 2011.

Skuldir fjármálafyrirtækja umfram eignir námu 7.040 milljörðum króna í árslok 2011 séu fjármálafyrirtæki í slitameðferð meðtalin, og hafði þó staða þeirra batnað um 857 milljarða króna á milli ára eða um 10,9%.

Fjáreignir erlendra aðila innan íslenska hagkerfisins námu 13.692 milljörðum króna í árslok 2011. Hreinar fjáreignir erlendra aðila á Íslandi voru í árslok 2011 9.343 milljarðar króna og höfðu rýrnað um 7,4% frá fyrra ári.