Vöruskiptin hagstæð um 75,7 milljarða

Vöruskiptin við útlönd voru hagstæð um 75,7 milljarða fyrstu ellefu mánuði ársins í fyrra. Fluttar voru út vörur fyrir 581,3 milljarða króna en inn fyrir 505,7 milljarða króna.

Þetta kemur fram á vefsíðu Hagstofunnar. Þar segir að í nóvembermánuði s.l. voru fluttar út vörur fyrir 54,6 milljarða króna og inn fyrir tæpa 44 milljarða króna. Vöruskiptin í nóvember voru því hagstæð um 10,6 milljarða króna. Í nóvember 2011 voru vöruskiptin hagstæð um 8,3 milljarða króna á sama gengi.

Fyrstu ellefu mánuðina 2012 voru fluttar út vörur fyrir 581,3 milljarða króna en inn fyrir 505,7 milljarða króna. Afgangur var því á vöruskiptunum við útlönd sem nam tæpum 75,7 milljörðum en á sama tíma árið áður voru þau hagstæð um tæpa 99 milljarða á sama gengi. Vöruskiptajöfnuðurinn var því 23,3 milljörðum króna lakari en á sama tíma árið áður.

Fyrstu ellefu mánuði ársins 2012 var verðmæti vöruútflutnings 2,7 milljörðum eða 0,5% meira á föstu gengi en á sama tíma árið áður. Iðnaðarvörur voru 52% alls útflutnings og var verðmæti þeirra 4% minna en á sama tíma árið áður.

Sjávarafurðir voru 43,3% alls útflutnings og var verðmæti þeirra 7,6% meira en á sama tíma árið áður. Mest aukning varð í útflutningi sjávarafurða, aðallega á ferskum fiski. Á móti kom samdráttur í verðmæti útflutnings iðnaðarvara, aðallega áls og álafurða.

Fyrstu ellefu mánuði ársins 2012 var verðmæti vöruinnflutnings 26 milljörðum eða 5,4% meira á föstu gengi en á sama tíma árið áður. Aukning innflutnings varð mest í flutningatækjum en á móti kom samdráttur í verðmæti innflutnings hrá- og rekstrarvara.