Veltan með fasteignir rúmir 13 milljarðar í borginni í desember

Fjöldi þinglýstra kaupsamninga um fasteignir við sýslumannsembættin á höfuðborgarsvæðinu í desember s.l. var 397.

Heildarvelta nam 13,4 milljörðum króna og meðalupphæð á hvern kaupsamning var 33,8 milljónir króna. Viðskipti með eignir í fjölbýli námu 9,4 milljörðum, viðskipti með eignir í sérbýli 2,5 milljörðum og viðskipti með aðrar eignir 1,5 milljörðum króna.

Þetta kemur fram á vefsíðu Þjóðskrár Íslands. Þar segir að þegar desember er borinn saman við desember árið áður fjölgar kaupsamningum um 6,4% og velta eykst um 8,2%.

Í desember 2011 var þinglýst 373 kaupsamningum, velta nam 12,4 milljörðum króna og meðalupphæð á hvern kaupsamning var 33,2 milljónir króna.