Seðlabankinn gerir hlé á inngripum á gjaldeyrismarkaði

Seðlabankinn telur að gengislækkun krónunnar á síðustu vikum ársins hafi verið óæskilega mikil, sérstaklega í ljósi þess að hún tengdist að verulegu leyti tímabundnum þáttum vegna áramótastöðu fjármálafyrirtækja. Auk þess hefur uppgreiðsla erlendra skulda einkaaðila veikt krónuna á undanförnum mánuðum.

Seðlabanki Íslands hefur ákveðið að gera hlé á reglulegum gjaldeyriskaupum bankans á gjaldeyrismarkaði. Frá septembermánuði árið 2010 hefur bankinn keypt vikulega gjaldeyri á markaði, fyrst hálfa milljón evra og frá júlí 2012 eina milljón evra, sem samsvarar um það bil hálfum milljarði króna í viku hverri. Á heildina litið námu gjaldeyriskaup Seðlabankans á árinu 2012 um það bil 20 milljarða króna en á móti kom að bankinn seldi gjaldeyri fyrir 3 milljarða króna í inngripum snemma í mars 2012 og á síðasta degi ársins.

Þótt Seðlabankinn telji eðlilegt að gera hlé á reglulegum gjaldeyriskaupum bankans, telur bankinn eftir sem áður að þegar aðstæður leyfi sé nauðsynlegt að kaupa á ný nægan gjaldeyri á millibankamarkaði til þess að standa undir vaxtagreiðslum vegna erlendra skulda ríkissjóðs og til lengri tíma litið telur bankinn æskilegt að hlutfall óskuldsetts gjaldeyrisforða hækki.