Vill að Andrés biðjist afsökunar

Aðalsteinn Á Baldursson, formaður Framsýnar, undrast ummæli Andrésar Magnússonar, framkvæmdastjóra Samtaka verslunar og þjónustu. Aðspurður sagði Andrés í fréttum RÚV í gær að heimila ætti frjálsan innflutning á kjúklingum þar sem framleiðslan hér á landi byggði meðal annars á innfluttu vinnuafli. Aðalsteinn segir að þessi ummæli byggi á alvarlegum fordómum í garð þessa fólks. Fyrirtæki á Íslandi hafi þurft að treysta á innflutt vinnuafl til að geta haldið úti starfsemi þar sem ekki hafi fengist vinnuafl á Íslandi.

„Hvað með fiskvinnsluna, byggingariðnaðinn, ferðaþjónustuna og kjötvinnsluna. Á að leggja þessar atvinnugreinar niður þar sem þær byggja töluvert á innfluttu vinnuafli," spyr formaður Framsýnar. Þá sé jafnframt athyglisvert að þessi ummæli komi úr þessari átt þar sem verslun og þjónusta hafi einnig þurft að treysta á innflutt vinnuafl. Aðalsteinn telur eðlilegt að framkvæmdastjóri Samtaka verslunar og þjónustu biðjist opinberlega afsökunar á þessum ummælum sem séu honum ekki sæmandi.