Vodafone og Nova sameina dreifikerfin

Til stendur að sameina dreifikerfi fjarskiptafélaganna Nova og Vodafone í eitt alhliða farsímadreifikerfi. Fjarskiptafélögin hafa ákveðið að ganga til formlegra viðræðna um stofnun nýs rekstrarfélags. Þetta kemur fram í tilkynningu frá Vodafone og Nova.

Hið nýja rekstrarfélag  mun reka sameinað farsímakerfi félaganna tveggja. Í tilkynningunni segir að engin breyting verði á samkeppni félaganna á fjarskiptamarkaði, þar sem samreksturinn snýr einungis að tæknilegu þáttum í rekstri þeirra. Reynsla annarra landa af sambærilegum samrekstri er góð, til dæmis í Danmörku, Svíþjóð og Bretlandi.

Ómar Svavarsson, forstjóri Vodafone segir að snjalltæknin sé samskiptamáti framtíðarinnar. „Almenningur treystir á að gagnaflutningshraði sé í samræmi við þarfirnar. Hingað til hefur samrekstur símafyrirtækjanna á dreifikerfum verið takmarkaður en með tæknilegum samrekstri skapast möguleikar til að gera Ísland að einu best tengda samfélagi í veröldinni.“

Liv Bergþórsdóttir, framkvæmdarstjóri Nova, segir að þau telji það skynsamlegt út frá mörgum sjónarhornum að sameina rekstur dreifikerfanna.  „Með því næst fram veruleg hagræðing í rekstri og við munum geta boðið öflugri þjónustu með minni tilkostnaði.“

Undirbúningsvinna vegna stofnunar félagsins hefur farið fram um nokkra hríð með vitneskju Samkeppniseftirlitsins og Póst- og fjarskiptastofnunar. Vodafone og Nova munu óska eftir heimild  þessara aðila til að stofna nýja rekstrarfélagið og að þeim fengnum mun félagið taka til starfa. Vonir standa til að það verði á fyrri hluta ársins 2014.

Í tilkynningunni segir að með sameiningu dreifikerfanna skapist mikil tækifæri til stækkunar og verulegt hagræði náist í fjárfestingum og rekstri. Einnig verður þétting og uppbygging kerfisins hraðari en annars væri mögulegt.