Hönnuðu kerfi til að einfalda störf lögmanna

Fyrirtækið Vergo hefur hannað hugbúnað eða kerfi sem kemur til með að einfalda vinnu lögmanna. Það eru þau Kjartan Valur Þórðarson tölvunarfræðingur og lögmennirnir Hildur Ýr Viðarsdóttir og Anna Þórdís Rafnsdóttir sem sáu um hönnun kerfisins.

Anna Þórdís segir kerfið hafi kom á markað í byrjun þessa árs og nú þegar hafi nokkrar lögmannsstofur byrjað að nota það.

„Áður en við hófum sölu á kerfinu var það í þróun og prufu hjá einni lögmannsstofu í um eitt og hálft ár. Það var því komin ágætis reynsla á hvernig það virkar áður en við byrjuðum að selja það,“ segir Anna Þórdís.

Anna Þórdís segir að hingað til hafi lögmannsstofur ekki verið með neina heildstæða lausn eða neitt eitt kerfi sem tekur á öllu. Þetta kerfi sé svar við við því.

Anna Þórdís segir að með svona kerfi aukist yfirsýn og öryggi. Hún segir segir að kerfið haldi utan um öll mál lögmanna, kerfið getur haldið utan um fresti og verkefni í málum. Hægt sé að forskrá mál og verkferla, það henti til dæmis afar vel í slysamálum sem eru rekin með svipuðum hætti í hvert sinn.

Kerfið heldur utan um hagsmunaárekstra, til dæmis ef einn lögmaður er með gagnnaðila sem er skráður umbjóðandi hjá öðrum lögmanni  á sömu stofu. Þá er tímaskráningakerfi og kostnaðarskráningarkerfi og hægt er að taka allar upplýsingar út sem tölfræði og gröf. Það nýtist til dæmis vel fyrir stjórnendur sem fá betri yfirsýn yfir verkefni stofunnar og hvernig starfsmenn skipta tíma sínum.

„Skemmtilegt að vinna að nýsköpun“

„Kjartan er hugbúnaðarsérfræðingurinn og sá um alla forritun á kerfinu,“ segir Anna Þórdís. „Við þrjú sáum um hönnun kerfisins í sameiningu og þar kom reynsla okkar Hildar Ýrar úr lögmannsstörfum sér vel. Við höfum í störfum okkar öðlast góða innsýn í hvernig best er að hafa svona kerfi.“

„Það er auðvitað skemmtilegt að vera hluti af svona nýsköpun á lögmannssviðinu og geta lagt eitthvað af mörkum þar,“ segir Anna Þórdís.

Þau Kjartan, Hildur Ýr og Anna Þórdís eru með fleiri lausnir í þróun sem miðuð eru að öðrum atvinnugreinum.