Of mikil kraftur algengustu mistökin

Þótt enn séu nokkrir mánuðir í að veiðisumarið hefjist er mikilvægt fyrir fluguveiðimenn að koma sér sem fyrst af stað, segir Hilmar Þ. Jónsson flugukastkennari.

"Algengustu mistökin sem fólk gerir er að setja of mikinn kraft í að kasta flugunni út. Það á ekki bara við um byrjendur heldur alla, þar á meðal sjálfan mig," segir Hilmar. "Köstin snúast ekki um neitt annað en tækni og að stjórna hreyfingunum."

Hilmar segir mikilvægt fyrir alla veiðimenn að koma sér sem fyrst af stað í fluguveiðinni, æfa köstin og ná úr sér ryðinu svo þeir komi vel undirbúnir fyrir sumarið. Hilmar er eini Íslendingurinn sem er með próf frá Federation of Fly Fishers. Hann er að fara stað með flugukastkennslu, í samstarfi við veiðiverslunina Vesturröst, en hann tekur aðeins fjóra nemendur á hvert námskeið svo hann geti sinnt hverjum og einum vel.

"Ég met hvern og einn nemanda fyrir sig og laga það sem laga má. Ef köstin eru fín förum við í svokallað presentation, það er hvernig flugan leggst á vatnið o.s.frv. Það er alltaf hægt að læra eitthvað nýtt," segir Hilmar Þ. Ég eyði ábyggilega hátt í milljón á ári í að reyna að læra eitthvað nýtt og það er fyrir utan allan tímann sem ég eyði í köstin."