Nýr dómur Hæstaréttar hefur áhrif á 1000 lánasamninga

Hæstiréttur komst í dag að þeirri niðurstöðu að lánasamningur sem fyrirtækið Umbúðamiðlun ehf. gerði við Íslandsbanka hefði verið í íslenskum krónum og bundinn við gengi erlendra mynta með ólögmætum hætti.

Í tilkynningu frá Íslandsbanka segir að sérfræðingar bankans séu nú að yfirfara niðurstöðu dóms Hæstaréttar í máli Umbúðamiðlunar en ljóst sé að hann hefur áhrif á tæplega 1.000 lán hjá bankanum, að mestu fyrirtækjalán. Meirihluti lánanna sem dómurinn tekur til hafa fengið tilboð um endurútreikning á grundvelli laga sem kennd voru við Árna Pál Árnason, þáverandi efnahags- og viðskiptaráðherra. Íslandsbanki segir að öll þau lán sem dómurinn tekur til verði endurreiknuð á ný ef aðstaða lántaka er sambærileg þeirri sem um var fjallað í dómum Hæstaréttar frá 15. febrúar og 18. október á síðasta ári sem tóku til fullnaðarkvittana vegna ólögmætra lána.

Samtals mun Íslandsbanki endurreikna um 15.000 ólögmæt gengistryggð lán einstaklinga og fyrirtækja í samræmi við dóma Hæstaréttar um fullnaðarkvittanir. Bankinn hafði áður fallið frá þremur dómsmálum til að flýta endurútreikningi. Meðal þeirra lána sem eru endurreiknuð eru uppgreidd lán, bílalán og lán sem hafa farið í gegnum úrræði sem bankinn bauð upp á. Íslandsbanki segir að dómurinn hafi ekki áhrif á lögmæti húsnæðislána Íslandsbanka í erlendri mynt en Hæstiréttur hafi skorið úr um að þau væru lögleg erlend lán þann 7. Júní 2012.

Áhrif dómsins á efnahagsreikning bankans munu verða metin og koma fram í ársreikningi fyrir árið 2012. Bankinn segir að eiginfjárstaða hans sé sterk og eiginfjárhlutfallið muni áfram vera yfir þeim lágmörkum sem Fjármálaeftirlitið setur.