Högnuðust um 2.683 milljónir

iHagnaður Bakkavarar Group á öðrum ársfjórðungi nam 14,3 milljónum sterlingspunda, eða sem svarar 2.683 milljónum króna.

Hagnaðurinn er 258 prósentum meiri en á sama tíma í fyrra þegar félagið hagnaðist um fjórar milljónir punda, eða sem svarar 750 milljónum króna.

Fram kemur í árshlutauppgjöri félagsins að þessa miklu breytingu á milli ára megi rekja til sölu fyrirtækja félagsins í Frakklandi og á Spáni fyrir um 26 milljónir punda.

Hagnaður vegna sölu fyrirtækjanna er sagður hafa numið 14,5 milljónum punda. Söluandvirðið hafi verið notað til að greiða niður skuldir.

Í tilkynningu félagsins er haft eftir Ágústi Guðmundssyni forstjóra Bakkavarar að fyrirtækið hafi haldið áfram á réttri leið á fjórðungnum með öflugum tekjuvexti og auknum hagnaði.

„Nýleg endurfjármögnun félagsins endurspeglar stuðning frá fjármálamörkuðum og eflir undirliggjandi styrkleika félagsins.“

Ágúst segir stöðu og stefnu félagsins góða þótt aðstæður á mörkuðum verði áfram krefjandi.