Sigga Beinteins tengist ekki gjaldþroti Stjórnarinnar ehf.

Sigríður Beinteinsdóttir söngkona hefur sent frá sér yfirlýsingu vegna frétta um gjaldþrot Stjórnarinnar ehf. þar sem hún kemur þeim upplýsingum á framfæri að félagið hafi ekkert með sig eða hljómsveitina Stjórnina að gera. Hún segist ekki hafa vitað af tilvist félagsins, sem var í eigu Grétars Örvarssonar, fyrr en hún las fréttir af gjaldþrotinu.

„Það verður því að teljast afar ósmekklegt og ósanngjarnt af fjölmiðlum að birta myndir af mér eða hljómsveitinni Stjórninni samhliða þessari frétt og er ég afar ósátt við það,“ segir Sigríður í yfirlýsingunni og bætir því við að félagið hafi aldrei verið notað í tengslum við spilamennsku eða útgáfu hljómsveitarinnar í gegnum tíðina.