Græn framtíð endurnýtir fyrir stærsta tryggingafélag Skandinavíu

Íslenska sprotafyrirtækið Græn framtíð hefur samið við Mondux, eitt stærsta tryggingafélag Skandinavíu, um endurnýtingu á smáraftækjum sem viðskiptavinir skila inn vegna tjóns.

Bjartmar Alexanderson framkvæmdastjóri segir Græna framtíð tryggja endurnýtingu á öllum smáraftækjum Mondux, en Mondux er með starfsemi í Danmörku, Noregi og Svíþjóð og nær samningurinn við Græna framtíð yfir starfsemi þess í öllum þremur löndum.

„Þessi samningur hefur gert það að verkum að okkar fyrirtæki getur vaxið mjög hratt á Skandinavíumarkaði. Mun hraðar en við bjuggumst við. Við höfum verið á minni mörkuðum svo sem eins og í Færeyjum, Grænlandi, Nýfundnalandi og Álandseyjum,“ segir Bjatmar.

Þetta hafi auðveldað þessu unga sprotafyrirtæki sem var stofnað árið 2009 að færa út kvíarnar enn frekar. Dennis Landbo Nielsen, forstjóri Mondux, segir að samstarfið við Græna framtíð feli í sér mikla möguleika fyrir félagið. Það gefi Mondux tækifæri á að öðlast grænar umhverfisvottanir og um leið efli það ímynd þess sem grænt fyrirtæki gagnvart viðskiptavinum og öðrum hagsmunaðilum á danska markaðinum.

„Okkar sérhæfing er sú að við tökum í raun og veru ónýt eða biluð raftæki, gömul eða alveg ónýt og við komum þeim í endurnýtingu, ekki endurvinnslu,“ segir Bjartmar. En á þessu sé mikill munur en Græn framtíð sé í samvinnu við sérfræðinga á þessum sviðum í Evrópu og tekur við öllum smátækjum til enduervinnslu hér á landi. Tæki sem ekki sé hægt að gera við séu notuð í varahluti. Tækin séu sem sagt gjörnýtt.

„Algjörlega og það er 21. aldar leiðin. Tuttugustu aldarleiðin var að endurvinna þessa hluti, ná í málmana, plastið og annað. Núna er þetta bara orðið svo rosalega mikið og Sameinuðu þjóðirnar telja að það falli til um 50 milljón tonn af rafeindaúrgangi á ári,“ áréttir Bjartmar.

Þetta sé dæmi um grænt sprotafyrirtæki sem muni skapa sérhæfð störf hér á landi, en með samningnum við Mondux standi til að ráða fólk á Íslandi til að fara yfir tækin sem verði flutt frá Skandinavíu til Íslands.

„Þegar við náðum þessum samningi í Danmörku sigruðum við fyrirtæki á heimsmarkaði sem er skráð í kauphöllinni í London og það sýnir það að íslenskt umhverfishugvit er samkeppnishæft í útlöndum,“ segir Bjartmar stoltur, enda aðeins um fjögur ár síðan hugmynd hans kviknaði í kjallaranum heima hjá honum.