Höfuðstöðvar Orkuveitunnar seldar á 5,1 milljarð

Stjórn Orkuveitu Reykjavíkur samþykkti á fundi sínum í dag kauptilboð í höfuðstöðvar fyrirtækisins að Bæjarhálsi 1 og Réttarhálsi 1 í Reykjavík. Höfuðstöðvarnar voru seldar á 5,1 milljarð króna, og verður hagnaður OR, um 600 milljónir króna.

Í tilkynningu segir að salan sé mikilvægur þáttur í framvindu Plansins, aðgerðaáætlun Orkuveitunnar og eigenda, með því að lausafjárstaða fyrirtækisins batnar sem söluandvirðinu nemur. Straumur fjárfestingabanki gerði tilboðið fyrir hönd óstofnaðs félags með fyrirvara um áreiðanleika könnun og endanlega fjármögnun.

„Í samþykkt stjórnar Orkuveitunnar felst að Orkuveitan muni leigja húseignirnar til 20 ára og hafa rétt til að kaupa þær aftur eftir 10 ár sem og við lok leigutímans. Endanlegur sölusamningur verður lagður fyrir stjórn Orkuveitunnar," segir í tilkynningunni.

„Við erum að vinna eftir ákaflega metnaðarfullu plani í rekstri Orkuveitunnar. Um síðustu áramót hafði það gengið eftir í öllum þáttum nema eignasölu. Sala stærri eigna er flókið viðfangsefni. Nú sjáum við fram á að geta lokið tveimur slíkum samningum, um höfuðstöðvarnar og Perluna. Þessi samningur er Orkuveitunni fjárhagslega hagstæður og það er mikilvægt að fyrirtækið eigi þess kost að eignina aftur þyki það skynsamlegt þegar þar að kemur," er haft eftir Bjarna Bjarnasyni, forstjóra Orkuveitu Reykjavíkur í tilkynningu.