Lækka gjaldskrá um 40%

Gjaldskrá Landsnets vegna upprunaábyrgðar á raforku hefur verið lækkuð um tæp 40 prósent.

Fram kemur í tilkynningu að tekjur fyrirtækisins af útgáfu upprunaskírteinanna hafi reynst umtalsvert meiri en gert var ráð fyrir þegar útgáfa þeirra hófst fyrir tæpum tveimur árum.

Gjald fyrir hvert útgefið skírteini hefur verið lækkað úr sjö krónum fyrir megavattsstundina í 4,3 krónur. Upprunaábyrgð er staðfesting á að raforka sé framleidd með endurnýjanlegum orkugjöfum, ekki orkugjöfum úr jarðefnaeldsneyti.

„Upprunaábyrgðir geta gengið kaupum og sölum og getur hvatinn fyrir slíkt verið margvíslegur, allt frá lagalegri skyldu að uppfylla ákveðinn grænan kvóta til þess að vilja sýna út á við að viðkomandi ýti undir nýtingu á endurnýjanlegum orkugjöfum við framleiðslu raforku,“ segir í tilkynningu Landsnets.

„Nú, þegar Landsnet hefur öðlast tæplega tveggja ára reynslu af þessari útgáfu, er ljóst að að kostnaður vegna útgáfu skírteinanna og umsjónar hefur verið lægri en áætlanir gerðu ráð fyrir, auk þess sem sölumagnið hefur verið umtalsvert meira en væntingar voru um.“