Ferðamenn átu skyndibita fyrir tvo milljarða króna

Greiðslukortavelta erlendra ferðamanna í september jókst um rúman fimmtung (22,4%) frá sama mánuði í fyrra og nam 6,5 milljörðum króna. Þetta kemur fram í nýrri samantekt Rannsóknaseturs verslunarinnar.

„Hver erlendur ferðamaður greiddi að jafnaði 89.000 kr. með greiðslukortum hér á landi í september sem er 8,1% hærri upphæð en í sama mánuði í fyrra,“ segir í samantekt Rannsóknasetursins.

Stærsti einstaki útgjaldaliðurinn er gistiþjónusta, en erlend kortavelta á gististöðum var um 1,6 milljarður króna í september, 26 prósentum meira en á sama tíma í fyrra. Kortavelta erlendra ferðamanna í verslunum var 1,4 milljarðar sem er 9% meiri velta en ári fyrr.

„Eins og fram hefur komið í umræðu nær ferðamannastraumur yfir sífellt lengra tímabil ársins. Þess sjást greinileg merki því aukin velta er í öllum flokkum nema fataverslun og minjagripaverslun,“ segir í tilkynningu Rannsóknasetursins.

„Þannig var erlend kortavelta bílaleiga 39% meiri í september en í sama mánuði í fyrra. Fjórföldun var í veltu gistirýmis utan hótela og 53% aukning á milli ára í skipulögðum ferðum eins og hvalaskoðun.“

Einnig er rýnt í einstaka liði erlendrar kortaveltu á síðasta ári. Þannig greiddu erlendir ferðamenn í fyrra með greiðslukortum sínum kostnað vegna skyndibita upp á 1,8 milljarða króna.

„Þá er vitaskuld ekki talið með það sem greitt hefur verið með reiðufé. Ef það er talið með má ætla að útlendingar hafi neytt skyndibita hér á landi fyrir meira en tvo milljarða kr.“

Fram kemur að heildarvelta erlendra greiðslukorta til veitingahúsa hafi verið 7,6 milljarðar í fyrra og því láti nærri að um fjórðungur af veitingahúsaveltunni hafi farið til skyndibitastaða.

Kortavelta útlendinga sem kaupa farmiða eða pakkaferðir til Íslands frá heimalandi sínu eru ekki innifaldar í þessum tölum nema kortaveltan fari í gegnum íslenska færsluhirða.

Þannig eru erlendar greiðslur vegna flugferða hingað til lands og greiðslur til erlendra ferðaskrifstofa eða annarra milliliða ekki taldar með í veltutölum Rannsóknaseturs verslunarinnar. „Þá eru úttektir á reiðufé úr hraðbönkum ekki innifaldar í þessum tölum.“

Með því að miða við upplýsingar Ferðamálastofu um komur erlendra ferðamanna til landsins kemst Rannsóknasetur verslunarinnar að því að greiðslukortavelta á hvern erlendan ferðamann í september hafi verið um 89 þúsund krónur. „Útgjöld á hvern ferðamann jukust um 8,1% í krónum talið.“