Ferðast um sveitina á rafbíl

Það eru vafalaust ekki margir í heiminum sem smíða eigin rafstöð og nýta meðal annars til að knýja heimilisbílinn. Einn þeirra er bóndinn og bifvélavirkinn Tryggvi Valdemarsson sem býr á Engi í Bárðardal. Hann virkjaði litla á við bæinn fyrir tuttugu árum og byggði rafstöð sem sér þremur bæjum í sveitinni fyrir rafmagni.

Nýlega lét hann gamlan draum rætast og fjárfesti í rafbíl af gerðinni Nissan LEAF sem hann er hæstánægður með. 

„Þetta var nú bara smá ævintýraþrá í mér, svona bílar eru kannski ekki mjög heppilegir langt úti á landi. Ég kemst þó 150 kílómetra á honum og get þannig keyrt til Akureyrar og Húsavíkur svo dæmi séu tekin. En ég þarf að hlaða hann þar til að komast heim aftur. Það eru reyndar ekki margar hleðslustöðvar á þessum slóðum en eftir því sem fleiri kaupa rafbíla bætast þær vonandi við.“

Rafbílinn hefur reynst Tryggva mjög vel að eigin sögn. „Hann er lipur og kraftmikill og hentar vel hér á landi. Næsta skref ætti að vera að komast yfir bíl sem kemst lengra á hleðslunni en slíkir bílar eru hins vegar mjög dýrir í innkaupum. Slíkir bílar komast um 400 kílómetra á einni hleðslu sem er auðvitað mikið framfaraskref.“

Ein hleðsla á bílinn hans Tryggva kostar um 300 krónur sem gera um þrjár krónur á kílómetrann. „Svo framleiði ég auðvitað rafmagnið sjálfur og fæ það þannig séð ókeypis.“

Aðspurður hversu lengi hann ætli að keyra á rafbíl segir hann rafhlöðurnar vera með fimm ára ábyrgð þannig að hann muni að minnsta kosti keyra hann næstu árin. „Ég er hins vegar kominn á áttræðisaldurinn og keyri ekki endalaust bíla. Ætli ég reyni ekki að minnsta kosti að klára þetta fimm ára tímabil rafhlöðunnar.“