Eins og litskrúðug gjöreyðing

„Leikurinn snýst í raun um greindarskertar geimverur sem svífa niður til jarðar og byrja að éta allt sem að kjafti kemst,“ segir Viggó Ingimar Jónasson hjá leikjafyrirtækinu Fancy Pants Global. Fyrirtækið hefur hannað leik fyrir iPhone og iPad en leikurinn minnir einna helst á teiknimynd og nefnist Zorblobs.

„Spilarinn reynir að verja sig með því að skjóta úr fallbyssu og reynir þannig að bjarga mannkyninu frá gjöreyðingu. Þetta er samt ekki mjög alvarlegt „concept“, þetta er meira eins og litskrúðug gjöreyðing,“ segir Viggó.

Fyrirtækið Fancy Pants Global var stofnað fyrir nokkrum árum. Fyrsti tölvuleikurinn sem fyrirtækið framleiddi, Maximus Musicus, var tilnefndur til tveggja verðlauna á norrænu leikjahátíðinni Nordic Game árið 2011.

„Í kjölfarið fórum við svo að tala um að okkur langaði mikið að gera eitthvað með geimverum og uppvakningum. Zorblobs hefur mótast í kerfinu í um það bil tvö ár. Loksins tókst okkur að gefa leikinn út og við erum mjög lukkulegir með það,“ segir Viggó.

Hann segir jafnframt að fyrirtækið bindi vonir við tölvuleikinn. „Við lögðum mikið upp úr því að skapa sögu í kringum þetta. Eftir nokkrar vikur ætlum við að gefa út fylgiforrit með leiknum sem verður fyrir iPad. Þar verður hægt að búa til sína eigin karaktera sem svo er hægt að skella á Facebook. Við verðum svo með samkeppni um hverjir búa til besta karakterinn og þegar við uppfærum leikinn fær karakterinn að fljóta með.“