Horfur Umami orðnar traustari

„Ég var kominn út úr þessu fyrir átta mánuðum en ég veit að félagið er í fullum rekstri. Það er verið að fóðra fullt af fiski og horfurnar eru góðar fyrir haustið,“ segir Óli Valur Steindórsson, stofnandi Umami, um stöðu félagsins í dag.

Fréttablaðið greindi frá því á þriðjudaginn að staða félagsins væri ótrygg og engar upplýsingar fengjust frá forsvarsmönnum þess.

„Ég er náttúrulega ekki innanbúðar í félaginu lengur en það er ljóst að lánardrottnar félagsins væru ekki að lána því 64 milljónir dollara nema þeir hefðu trú á félaginu,“ segir Óli. Félagið fékk lánveitinguna samþykkta þann 26. júní samkvæmt fréttatilkynningu.

Atlantis, félag Óla Vals sem áður átti 62 prósent í Umami, varð gjaldþrota í janúar. Það skuldaði dótturfélaginu rúmlega 17,2 milljónir Bandaríkjadala, jafnvirði tæplega 2,2 milljarða króna, í júní í fyrra. Óli segir þessa skuld nú hafa verið gerða upp.

Hann þurfti að láta af stöðu framkvæmdastjóra Umami í kjölfar fjandsamlegrar yfirtöku á félaginu á seinasta ári. „Þetta félag var eins og sjötta barnið mitt, þannig að þetta er dálítið leiðinlegt. Ég veit samt að félagið er tryggt í dag og það eru aðrir búnir að taka við þessu.“