Fyrstur Íslendinga til að hljóta Microsoft vottun

Gísli Guðmundsson, kerfisstjóri hjá Advania, er fyrstur Íslendinga til að fá „Microsoft Most Valuable Professional“ (MVP) vottunina sem Microsoft veitir árlega notendum hugbúnaðar frá fyrirtækinu.

Þeir sem fá vottunina þykja skara fram úr hvað varðar tækniþekkingu, leiðtogahlutverk í notendahópnum og aðstoð við aðra Microsoft notendur.

Gísli segir það mikinn heiður að hljóta vottunina en af þeim rúmlega 100 milljónum manna sem taka þátt í notendasamfélögum Microsoft lausna fá aðeins um 4.000 MVP vottun árlega.

Gísli hlaut gráðuna meðal annars á grundvelli sérþekkingar sinnar á svokölluðum Application Virtulization lausnum Microsoft.

„Það er mikill heiður að fá MVP vottun og valið kom mér svo sannarlega á óvart. Undanfarin ár hef ég gefið notendum ráð og leiðbeiningar með bloggi og vídeó leiðbeiningum. Ég hef fengið góð viðbrögð þeirra notenda sem fylgjast með því sem ég er að gera."

„Þetta hvetur mann til að afla sér meiri þekkingar og vonandi ná vottun aftur að ári og jafnvel fá vottanir í fleiri Microsoft greinum. Mér finnst þetta svipað eins og Ísland hafi unnið gull í ólympíuleikjum tölvunörda,“ segir Gísli.

Halldór Jörgenson framkvæmdastjóri hjá Microsoft segir þetta ekki einungis heiður fyrir Gísla heldur jafnframt fyrir tæknisamfélagið á Íslandi í heild sinni.

„Það hefur ávallt verið takmark okkar að Íslendingur hlyti þessa vottun. Nú hefur þessu takmarki verið náð sem eykur athygli erlendra aðila á hæfni íslensks tæknisamfélags, og leggur grunninn að nýjum tækifærum“ segir Halldór sem telur að tæknisamfélag á Íslandi hafi notið góðs af framlagi Gísla á síðustu misserum.