Ríki deila nú frekar skattupplýsingum

Gífurlegum fjárhæðum er haldið utan heimalanda án þess að greiddar séu af þeim skattar og gjöld, að því marki sem skattgreiðendur skjóta sér undan skilum í heimalöndum sínum. 

Þetta kemur fram í nýrri skýrslu Efnahags- og framfarastofnunarinnar, OECD, sem birt var í gær í tilefni af fundi átta helstu iðnríkja (G8) á Írlandi.

Í skýrslunni er fjallað um vitundarvakningu sem orðið hafi á meðal ríkja heims á nauðsyn þess að efla samstarf og upplýsingagjöf á sviði skattamála.

„Núna er almennt mikið meiri skilningur á því í heiminum að þeir sem koma sér undan greiðslu skatta eru að flytja skattbyrðina yfir á samborgara sína aðra eða önnur ríki. Og þegar þrengir svona mikið að þá geta menn náttúrlega ekki fallist á að menn láti einhverja aðra greiða reikningana sína,“ segir Skúli Eggert Þórðarson ríkisskattstjóri.

Skúli Eggert segir að hér á landi fáum við umtalsvert magn af upplýsingum frá öðrum ríkjum og gefum upplýsingar á móti. Ísland hafi nýverið komið mjög vel út úr úttekt sem gerð hafi verið á upplýsingaskiptum á milli landa innan OECD.

„Þetta er allt að opnast og hefur horfið til mun betra horfs en verið hefur undanfarin ár. Orðinn er alþjóðlegur skilningur á því að berja þurfi þessa múra niður.“ Spurning sé hversu mikið sé hægt að horfa til fortíðar í gagnaöflun en í það minnsta til framtíðar horft sé ljóst að skattaskjólum fari fækkandi.

„Það er orðið erfitt að koma fyrir fjármunum og fela, hvort sem það er fyrir skattyfirvöldum, kröfuhöfum eða öðrum.“ Miklu betri horfur séu á því nú en verið hafi að hægt verði að koma þessum málum öllum upp á yfirborðið.

„Þar með skiptir auðvitað miklu máli að takist að upplýsa um eignarhald á þessum félögum í þessum aflandsríkjum, því það hefur verið eitt mesta vandamálið, að fá ekki upplýsingar um eigendur félaga. Svo er það líka samkeppnismál.“

Í skýrslu OECD í tilefni af fundi G8 ríkjanna er lögð fram áætlun um næstu skref í samræmingu upplýsinga sem ríki deili með sér og þá tækni sem liggja þurfi að baki.

Þannig hafi Evrópuríkin Frakkland, Þýskaland, Ítalía, Spánn og Bretland, í samvinnu við Bandaríkin, unnið að hönnun grunnupplýsingakerfis sem fjármálafyrirtæki getið notað í samskiptum við skattyfirvöld, sem svo aftur deili með sér gögnum á milli landa á sjálfvirkan máta.

Skúli Eggert segir erfitt að geta sér til um hvernær slík upplýsingagjöf geti orði almenn um heim allan, dálítið mismunandi sé eftir löndum hvernig gangi að koma á umbótum. Í öllum meginatriðum stefni hins vegar í rétta átt.

Nú þegar eru 55 ríki, innan sem utan OECD, aðilar að sáttmála um aukna upplýsingagjöf á sviði skattamála.