Meint svik starfsfólks í skattaskjólum könnuð

Rannsókn er hafin á meintum skattsvikum tuga einstaklinga sem störfuðu hjá aflandsfélögum í eigu íslenskra aðila í erlendum skattaskjólum. Rannsóknin leiðir af athugun á félögunum sem slíkum.

„Við erum yfirleitt ekki að skattleggja aflandsfélög heldur einstaklinga vegna þess ávinnings sem þeir höfðu af því að setja starfsemi sína í aflandsfélög,“ segir Gunnar Thorberg, forstöðumaður rannsóknasviðs. „Við rannsókn okkar á örfáum aflandsfélögum úti í heimi kom í ljós að hjá þeim störfuðu margir án þess að greiða skatt hér. Þessum málum erum við að vinna í núna.“ Á fimmta tug svokallaðra skattaskjólsmála hafa verið til rannsóknar hjá skattrannsóknarstjóra frá því skömmu eftir hrun. Rannsókn á fjórða tug mála er lokið og hafa flest fengið endurákvörðun hjá ríkisskattstjóra. Sjö voru send sérstökum saksóknara. Þremur málum var lagt, að sögn Gunnars. Hann greinir frá því að í sumum málanna sé um að ræða hundraða og jafnvel milljarða króna hagnað sem ekki hafi verið greiddur réttur skattur af. „Rannsóknir þessara mála hafa gengið vel þrátt fyrir að mörg hver hafi verið umfangsmikil og flókin.“

Starfsmönnum embættis skattrannsóknarstjóra var fjölgað fljótlega eftir hrun. „Við vorum um 20 og fengum fjármagn til að ráða tíu starfsmenn til viðbótar. Þetta hefur hjálpað gríðarlega mikið en æskilegt væri að við værum fleiri í ljósi verkefnastöðu embættisins. Ég hef starfað hér í 20 ár og hef aldrei upplifað jafnmikinn fjölbreytileika í málum.“ Auk skattaskjólsmála og afleiðuviðskipta, til dæmis gjaldmiðlaskiptasamninga, eru fjöldamörg önnur skattsvikamál til rannsóknar. „En það er sérstaklega í sambandi við skattaskjólsmálin sem mörg önnur mál hafa verið opnuð hjá okkur.“