Allt þetta tal er bara öfund

Ingi Þór Steinþórsson, þjálfari Snæfells, hélt því fram í rimmu sinni við Stjörnuna í undanúrslitum Dominos-deild karla að Stjarnan væri að tefla fram dýrasta liði Íslandssögunnar. Það eru ekki einu neikvæðu ummælin sem Stjörnumenn hafa mátt þola í vetur.

Því er iðulega haldið á lofti að liðið sé með fjóra útlendinga og gárungarnir hafa á stundum kallað það lið Sameinuðu þjóðanna. Hjá Stjörnunni eru tveir Íslendingar sem eru af erlendu bergi brotnir - Justin Shouse og Jovan Zdravevski - ásamt tveim Bandaríkjamönnum.

„Svona ummæli peppa okkur upp frekar en annað. Um leið og menn fara í svona umræður finnst mér það vera uppgjöf og veikleikamerki,“ sagði Teitur Örlygsson, þjálfari Stjörnunnar.

„Við erum með nákvæmlega sama lið og í fyrra nema að það eru nýir útlendingar hjá okkur eins og hjá öðrum.“

Teitur segir að umræðan um ríkisfang þeirra Shouse og Zdravevski komi reglulega upp.

„Hvenær ertu Íslendingur? Hann stendur í skólanum á morgnana, fer í búðina á leið heim úr vinnu og kaupir sér þorramat í flottu lopapeysunni sinni. Hann greiðir skatta til samfélagsins og borgar laun hjá fólki sem er á bótum og rífur kjaft. Svo eru til íslenskir leikmenn sem hafa varla unnið handtak og eru að fá greitt svart. Hvor þessara tveggja er meiri Íslendingur?“

Teitur segir sitt lið eðlilega njóta góðs af því að hafa menn eins og Shouse og Zdravevski í sínu liði.

„Þetta eru samt ekki fyrstu gaurarnir sem fá ríkisborgararétt. Við erum með sama lið og síðustu ár en með betri útlendinga og okkur gengur betur. Þá kemur kannski öfund. Maður heyrði þetta ekki í fyrra. Öfundin er hluti af þessu. Þegar menn tapa þá fara þeir í alls kyns pakka. Hvað eigum við að senda Justin og Jovan í önnur lið? Myndu þau segja nei við því að fá þá? Við erum lánsamir að hafa þessa menn og svona umræða fellur alltaf um sig sjálfa.“

Teitur furðar sig einnig á umræðunni um að þetta sé dýrasta lið Íslandssögunnar.

„Það er þvæla að Bandaríkjamennirnir séu sérstaklega dýrir. Þeir eru ekki nálægt því að vera dýrustu Kanarnir í deildinni,“ sagði Teitur en hermt hefur verið að maður eins og Jarrid Frye væri með um 500 þúsund krónur í mánaðarlaun hjá Stjörnunni.

„Ætli það sé ekki um helmingi minna. Ætli Kanarnir á Íslandi séu ekki með um 215 til 260 þúsund krónur á mánuði. Einhverjir eru kannski dýrari en þeir komu þá síðasta sumar. Þeir sem koma síðar eru þá með lausan samning og fást á minni pening,“ sagði Teitur. En hvað með Íslendingana?

„Marvin var búinn að spila í 1. deildinni í mörg ár og það virtist enginn hafa áhuga á honum er við náðum í hann. Sá hefur heldur betur staðið sig. Fannar var orðin áttundi eða níundi maður hjá ÍR er hann kom til okkar. Hann er fyrirliði okkar og byrjunarliðsmaður. Jovan er örugglega ekki á miklum launum eftir árið í fyrra. Hann er örugglega að borga til baka. Þessi umræða er bara þvæla. Það eru engin rök fyrir þessu tali og við nýtum okkur svona umræðu til þess að þjappa okkur saman.“

Teitur er að klára sitt fjórða ár með Stjörnuliðið og það hefur styrkst með hverju ári. Er hann loksins kominn með liðið sem fer alla leið?

„Þetta er örugglega sterkasta liðið sem ég hef verið með í höndunum. Ég hef ekki þurft að púsla miklu saman því þá voru Justin, Jovan og Fannar þarna en þetta eru þrír byrjunarliðsmenn. Liðið var aftur á móti búið að vinna einn leik og tapa níu er ég kem að því. Liðið var þá neðst í deildinni. Kjarninn hefur verið til staðar lengi,“ sagði Teitur og bendir á að sitt lið hafi alltaf fallið úr leik gegn sterku liði.

„Síðustu þrjú ár hefur liðið sem við töpuðum gegn orðið Íslandsmeistari. Stefnan er að breyta því að þessu sinni,“ sagði Teitur en Stjarnan hefur aldrei orðið Íslandsmeistari í körfubolta.

Sportið á Vísi er komið á Facebook. Fylgstu með.