Hugmyndabanki tengir nemendur og fyrirtæki

Samtök atvinnulífsins hafa skrifað undir samstarfssamning við Íslenska sjávarklasann um að taka þátt í að byggja upp hugmyndabanka á internetinu um lokaverkefni háskólanema.

Þar geta fyrirtæki sett inn verkefni sem þau vilja gjarna láta vinna og nemendur komist í bein tengsl við fyrirtæki sem þau hafa áhuga á að vinna fyrir.

Samkvæmt tilkynningu frá SA leita hundruð háskólanemenda á hverju ári að spennandi og hagnýtum lokaverkefnum og er hugmyndabankinn settur upp til að auðvelda leitina.

Samtök atvinnulífsins hvetja aðildarfyrirtæki sín til að taka þátt í verkefninu og nýta þetta góða tækifæri. Nemendur fá hagnýta reynslu og kynnast atvinnulífinu af eigin raun á meðan námi stendur og fyrirtæki fá aðstoð við að leysa úr brýnum viðfangsefnum.

Skráningar fyrir nemendur og fyrirtæki er þeim að kostnaðarlausu og verkefni geta verið í hvaða atvinnugrein sem er.

Meðal verkefna sem nú er að finna á vefnum er til dæmis hönnunarverkefni með skírskotun til sjávarútvegs, útlitshönnun bifreiða, gerð rafrænnar vöruhandbókar fyrir framsækið iðnfyrirtæki, fiskeldi á Vestfjörðum og verkefni um framleiðslu á etanóli með hitakærum bakteríum.