Hætta á bólumyndun á hlutabréfamarkaði

Gengi hlutabréfavísitölunnar mun hækka um 14 prósent á árinu 2013, fjögur ný félög verða skráð á markað og töluverð hætta er á verðbólu á hlutabréfamarkaði. Þetta eru helstu niðurstöður í spá greiningardeildar Íslandsbanka sem kynnt var í síðustu viku. Strax í kjölfar kynningarinnar jukust viðskipti á hlutabréfamarkaði umtalsvert.

Íslandsbanki hélt morgunverðarfund með fjölmörgum fjárfestum fimmtudaginn 10. janúar síðastliðinn. Þann fund sátu meðal annars valdir einstaklingar ásamt fulltrúum lífeyris- og verðbréfasjóða. Á honum kynnti bankinn afkomuspá sína fyrir íslenskan hlutabréfamarkað árið 2013. Spáin, sem Fréttablaðið hefur undir höndum, er kirfilega merkt þannig að hún sé ekki ætluð almenningi.

Í niðurstöðum Íslandsbanka kemur fram að greining bankans telur að hlutabréfavísitalan muni hækka um fjórtán prósent á árinu 2013. Það er aðeins minni hækkun en á árinu 2012 þegar vísitalan hækkaði um 16,5 prósent. Einstök félög hækkuðu þó meira á því ári. Icelandair hækkaði til dæmis um 63 prósent og Hagar um tæp 40 prósent.

Þetta er í andstöðu við þá þróun sem á sér stað í nágrannalöndum okkar þar sem vaxtarmöguleikar hafa víðast hvar dregist saman samhliða minnkandi hagvexti.

Í spánni segir að bankinn telji að „spurn eftir innlendum hlutabréfum verði talsverð á árinu. Hrein fjárfestingaþörf lífeyrissjóðanna er áætluð um 128 ma.kr. á árinu 2013. Reikna má með því að stór hluti þess fjármagns leiti inn á hlutabréfamarkaðinn m.a. vegna þess að eign þeirra í innlendum hlutabréfum er enn talsvert undir fjárfestingastefnu sjóðanna. Því til viðbótar er mikið af innlánum sem munu eflaust leita í hlutabréf þegar kostirnir þar verða fleiri“.

Kennitölusamanburður Íslandsbanka bendir til þess að Icelandair, Hagar og Eimskip séu þeir fjárfestingarkostir sem helst ætti að fjárfesta í auk þess sem kauptækifæri séu í Regin, sem sé þó langtímafjárfesting.

Íslandsbanki telur enn fremur að fjögur félög verði skráð á markað á þessu ári. Þau eru Reitir, TM, N1 og Advania. Bankinn áætlar að samanlagt markaðsvirði eiginfjár þeirra verði á bilinu 39 til 44 milljarðar króna. Til samanburðar má nefna að markaðsvirði Eimskips og Icelandair er hvort um sig tæplega 50 milljarðar króna. Því er stærð þeirra félaga sem búist er við að komi inn á markaðinn tiltölulega hófleg.

Í niðurstöðum greiningar Íslandsbanka segir að fjármagnshöftin sem eru við lýði skekki verðmyndun á innlendum hlutabréfamarkaði og öðrum eignamörkuðum. Þau beini fjárfestum sem eiga krónur að innlendum fjárfestingarkostum og þrýsti þar af leiðandi verði þeirra upp. Þá haldi þau vöxtum niðri sem hækkar eignaverð. Í spánni segir að hvort tveggja geti valdið verðbólu á innlendum hlutabréfamarkaði.

Kennitölusamanburður á íslenskum og erlendum samanburðarfélögum þykir ekki benda til að bóla sé að myndast á íslenska hlutabréfamarkaðnum enn sem komið er en að „hættan á að slík verðbóla skapist er þó talsverð og vex hættan eftir því sem höftin eru hér lengur“. - þsj / mþl