Frægur markaðsmaður til Íslands

Philip Kotler, sem hefur verið kallaður faðir nútímamarkaðsfræði, heldur fyrirlestur í Háskólabíói 24. apríl. „Það má segja að þetta sé áhrifamesti markaðsmaður síðustu aldar og áfram eftir það," segir Árni Árnason hjá Iceland Business Forum.

Kotler er prófessor í alþjóðamarkaðsfræði við Kellogg School of Management innan Northwestern-háskóla í Evanston, Illinois í Bandaríkjunum. Hann er höfundur markaðsfræðibókarinnar Marketing Management: Analysis, Planning, Implementation and Control, mest notuðu slíkrar bókar í framhaldsnámi í viðskiptafræði í heiminum.

Fyrirlesturinn fjallar um hvernig markaðsfræðin tekst á við þær miklu breytingar sem hafa orðið og eru að verða á umhverfi neytenda. „Það verður gaman að heyra hans sýn á umhverfið sem við vinnum við í dag." Þetta er eini fyrirlesturinn sem Kotler heldur í Vestur-Evrópu á þessu ári.

Það er Iceland Business Forum, sem er samstarfsverkefni Kotler Impact og íslenska fyrirtækisins KNÞ, sem stendur fyrir námskeiðinu í samstarfi við Icelandair, Póstinn og Símann. Nánari upplýsingar má finna á Ibf.is en einnig er hægt að nálgast miða á Miði.is.

Miðaverð er 69.900 krónur fyrir þá sem bóka sig í janúar. „Fyrir heilsdagsnámskeið finnst okkur þetta afar sanngjarnt. Svona námskeið erlendis kosta yfirleitt um 200 þúsund krónur," segir Árni, spurður út í miðaverðið. -fb