Heitreyktur makríll hlaut gullverðlaun

Norðurlandakeppni í smáframleiðslu matvæla er ný lokið en hún var haldin í Östersund í Svíþjóð. Þar fékk heitreyktur makríll frá Sólskeri á Hornafirði gullverðlaun í flokki heitreykts fisks.

Alls bárust um 600 vörur en 40 verðlaun voru veitt í keppninni og auk heitreykta makrílsins, fékk Klaus Kretzer frá Skaftafelli silfurverðlaun fyrir Hnjúk, sem er þurrverkaður og reyktur kinda hryggvöðvi.  Klaus fékk einnig bronsverðlaun fyrir Jöklabita sem er ölpylsa unnin úr kindakjöti.

Frá þessu er sagt á heimasíðu Matís, en þessar þrjár vörur voru allar þróaðar í Matarsmiðjum Matís. „Sem sýnir enn og aftur mikilvægi þess að frumkvöðlum og smáframleiðendum í matarhandverki sé gert kleift að taka sín fyrstu skref á sem hagkvæmastan og öruggastan hátt sem síðar, ef vel gengur, getur leitt til fleirri atvinnutækifæra og fjölbreyttara vöruúrvals,“ segir á heimasíðu Matís.