Rannsókn á Landsbankamáli felld niður af sérstökum saksóknara

Sérstakur saksóknari hefur fellt niður rannsókn á hendur fimm fyrrverandi stjórnendum gamla Landsbankans.

Mennirnir eru Hannes Júlíus Hafstein, fyrrverandi deildarstjóri fjárfestingabanka á lögfræðisviði Landsbankans, Jón Þorsteinn Oddleifsson, fyrrverandi forstöðumaður fjárstýringar, Stefán Héðinn Stefánsson, fyrrverandi framkvæmdastjóri eignarstýringar og Þórir Örn Ingólfsson, fyrrverandi forstöðumaður áhættustýringar bankans.

Rannsóknin snerist að þremur málum, þar sem meðal annars milljarðar króna voru millifærðir af reikningi Landsbankans í Seðlabankanum inn á reikninga í eigu Straums og MP banka hinn 6. október 2008, sama dag og neyðarlögin voru sett. Daginn eftir tók skilanefnd yfir rekstur bankans. Þriðja málið snerist um millifærslu vegna kaupa Landsbankans á verðbréfum í sjóðum Landsvaka eftir lokun sjóðanna.

„Rannsóknin var komin á endastöð,“ segir Arnþrúður Þórarinsdóttir, saksóknari hjá embættinu í samtali við Vísi.

Sigurjón Þ. Árnason, fyrrverandi bankastjóri Landsbankans, var einnig til rannsóknar sérstaks saksóknara í tengslum við málið.

Mennirnir fjórir voru allir handteknir í kjölfar húsleitar sem framkvæmd var þann 20. janúar 2011 hjá Straumi fjárfestingabanka, MP banka sem og í húsakynnum Seðlabanka Íslands. Þeir voru færðir til yfirheyrslu en ekki var krafist gæsluvarðhalds yfir þeim.

Arnþrúður segir að embættinu beri að meta hvort mál séu líkleg til sakfellis og í þessu tilfelli hafi það verið mat þeirra að svo væri ekki. Því var málið fellt niður og hefur tilkynning verið send til allra sakborninga um niðurfellingu málsins.

„Að öllu virtu í þessu máli töldum við skilyrði skilasvikaákvæðis hegningarlaga til að einhver geti borið refsiábyrgð, ekki uppfyllt, hvorki efnisleg né huglæg,“ segir Arnþrúður.