Rannsókn lögreglu víkkuð út

Rannsókn sérstaks saksóknara á málefnum Hjúkrunarheimilisins Eirar kann að ná yfir þætti sem nefndir eru í nýrri úttekt Deloitte á málefnum Eirar. Sú úttekt var birt í gær og var unnin að beiðni nýrrar stjórnar heimilisins.

Samkvæmt heimildum blaðsins hefur rannsókn sérstaks saksóknara aukist nokkuð að umfangi frá því að þrír fyrrverandi stjórnarmenn Eirar afhentu embættinu gögn í desember síðastliðnum og óskuðu eftir rannsókn á starfsháttum Eirar.

Í vor kallaði embætti sérstaks saksóknara svo eftir frekari gögnum frá nýrri stjórn hjúkrunarheimilisins, meðal annars gögnum sem varða samninga við íbúa.

Í skýrslu Deloitte segir meðal annars að meta þurfi hvort stjórnendur Eirar kunni að hafa farið á svig við lög í störfum sínum fyrir stofnunina. Meðal annars er fjallað um greiðslur úr þróunarsjóði á árunum 2009 til 2011.

„Greiðslurnar námu samtals 2,7 milljónum króna og voru vegna dagpeninga, flugferða, gistinga og veitinga erlendis sem tengjast fyrrverandi forstjóra Eirar og fjölskyldumeðlimum hans, fyrrverandi fjármálastjóra Eirar og maka hans, fyrrverandi framkvæmdastjóra rekstrar og fyrrverandi starfsmanni Eirar,“ segir í skýrslunni. 

Greiðslurnar voru samþykktar ýmist af fyrrverandi forstjóra og/eða framkvæmdastjóra. 

„Út frá þeim gögnum sem við skoðuðum hefur ekki verið sýnt fram á að greiðslurnar tengist með beinum hætti rekstri Eirar og við teljum því líkur á að um óeðlilegar greiðslur geti verið að ræða.“

Jón Sigurðsson, stjórnarformaður Eirar frá því í desember síðastliðnum, segir að stjórnin fari nú yfir ábendingar skýrslunnar og kalli eftir svörum og skýringum eftir því sem við eigi.

„Ég byrja ekki á því að væna starfsmenn um einhver óheilindi,“ segir Jón. Rétt sé að gefa fólki færi á að gefa skýringar á hlutum sem kunni að vera óljósir. Þá fari lögmaður Eirar einnig yfir skýrsluna og ráðleggi stjórninni um næstu skref.

Jón gerir ráð fyrir að málið verði tekið upp á næsta stjórnarfundi Eirar í ágúst. „Nema að eitthvað komi upp í skoðun lögmannsins sem kalli á snarpari viðbrögð. Við boðum þá aukafund ef ástæða er til þess.“

Ólafur Þór Hauksson, sérstakur saksóknari, segist ekki geta tjáð sig um umfang eða möguleg lok rannsóknar á málefnum Eirar. Á honum má hins vegar skilja að atriði í skýrslu Deloitte þurfi ekki að vera tilefni nýrra kæra til lögreglu. 

„Ef um er að ræða brot á hegningarlögum er rannsakari, almennt séð, ekki bundinn af kröfugerð. Embættið getur afmarkað rannsókn með því að þrengja hana eða víkka hana út og þarf ekki nýja kæru til þess,“ segir Ólafur og bætir við að algengt sé í rannsókn sakamála, hvort sem það eru efnahagsbrot eða önnur mál, að eitthvað nýtt komi fram þegar að sé gáð.

Um hjúkrunarheimilið EirHjúkrunarheimilið Eir er sjálfseignarstofnun, stofnuð í ágústlok 1990 af Reykjavíkurborg, Seltjarnarnesbæ, Samtökum blindra og blindravina, Sjómannadeginum í Reykjavík og Hafnarfirði, Sjálfseignarstofnuninni Skjóli, VR og Félagi áhugafólks og aðstandenda Alzheimersjúklinga og annarra sjúkdóma.

Árin 2007 til 2011 sátu í stjórn Eirar Vilhjálmur Þ. Vilhjálmsson (formaður), Magnús L. Sveinsson (varaformaður), Helga Eysteinsdóttir, Haukur Helgason, Tómas Helgason, Vilhjálmur B. Vilhjálmsson og Herdís Sigurjónsdóttir.

Sigurður Helgi Guðmundsson var forstjóri frá stofnun Eirar til aprílloka 2011. Vilhjálmur Þ. Vilhjálmsson var stjórnarformaður Eirar í meira en áratug og sá á þeim tíma um eignaumsýslu stofnunarinnar, eða til júlíloka 2012, að því er fram kemur í nýrri skýrslu Deloitte. „Vilhjálmur gegndi tímabundið stöðu framkvæmdastjóra á árinu 2011 eftir að Sigurður Helgi lét af störfum.