Endurfjármögnun Klasa er lokið

Endurfjármögnun Klasa fasteignir ehf er lokið. Klasi í samstarfi við KLS fagfjárfestasjóð í rekstri Stefnis hf. hefur lokið útgáfu 5,7 milljarða eignavarinna skuldabréfa.

Útgáfan er verðtryggð til 30 ára, ber 4,2% vexti og er varin með fasteignasafni Klasa fasteigna. Skuldabréfin verða skráð í Kauphöllinni.

Þetta kemur fram í tilkynningu um málið. Þar segir að Klasi var stofnaður í maí 2004. Frá upphafi hefur félagið stefnt að því að vera leiðandi á sviði fasteignareksturs og fasteignaþróunar á Íslandi.

Félagið hefur nú lokið endurfjármögnun á tekjuberandi eignasafni sínu sem samanstendur af um 28.500 fm af atvinnuhúsnæði að virði um 8,3 milljarða króna. Auk þess hefur Klasi fjárfest í fasteignum og lóðum til þróunar sem samhliða endurfjármögnun hafa verið seldar til systurfélaga Klasa fasteigna ehf.

Meðal þróunarverkefna þá ber helst að nefna uppbyggingu í miðbæ Garðabæjar þar sem gert er ráð fyrir allt að 88 nýjum íbúðum og um 2.600 fm af verslunar- og þjónustuhúsæði auk bílakjallara. Áformað er að framkvæmdir hefjist á vormánuðum.