Afkoma Árborgar jákvæð um tæpar 176 milljónir

Rekstrarafkoma sveitarfélagsins Árborgar var  jákvæð um 175,7 milljónir kr. sem er 106,5 milljónum kr. betri niðurstaða en áætlun gerði ráð fyrir.

Þetta kemur fram í tilkynningu um uppgjörið til Kauphallarinnar. Heildartekjur samstæðu voru tæplega 5,6 milljarðar kr. og heildarútgjöld rétt rúmir 4,4 milljarðar kr. Rekstrarhagnaður fyrir fjármagnsliði, afskriftir og skatta er því 1.179 milljónir kr. sem er 238 milljónum kr. hærra en áætlun gerði ráð fyrir.

Fjármagnsgjöld vega þungt eða 614 milljónir kr. nettó og afskriftir eru 364 milljónir kr. og er rekstrarafkoma samstæðunnar því 200 milljónir kr. fyrir skatta eða 131 milljónir kr. hærri en áætlun gerði ráð fyrir. Tekjuskattur nemur 25 milljónir kr. á árinu.

Skuldahlutfall var komið niður í 160,4% í lok árs 2012.

„Rekstur sveitarfélagsins er í traustum farvegi og hefur reksturinn skilað hagnaði þrjú ár í röð þrátt fyrir erfiða tíð, háar skuldir og mikla verðbólgu. Þetta hefur tekist með samstilltu átaki kjörinna fulltrúa, starfsmanna og íbúa sem hafa sýnt þessu erfiða verki einstaklega góðan skilning,“ segir í tilkynningunni.