Gera athugasemd við ákvörðun ESA

Atvinnuvega- og nýsköpunarráðuneytið hefur gert  athugasemdir við þá ákvörðun Eftirlitsstofnunar EFTA, ESA, að hefja formlega rannsókn á framkvæmd laga um ívilnanir vegna nýfjárfestinga á Íslandi.

Ráðuneytið segir í tilkynningu að lögin hafi verið sett árið 2010 og öðlast gildi eftir yfirferð og samþykkt ESA um að kerfið væri í samræmi við reglur EES samningsins. Síðan þá hafi verið gerð ein breyting á reglugerð sem hafi ekki haft í för með sér efnislegar breytingar á hinu samþykkta kerfi. Þá hafi verið samþykkt á Alþingi í mars síðastliðnum breyting á lögunum sem  ekki hafi enn komið til framkvæmda þar sem hún sé háð samþykki ESA og hafi verið til meðferðar hjá stofnuninni undanfarna mánuði.

„Frá gildistöku laganna 2010 hafa verið undirritaðir sex fjárfestingarsamningar og hafa þeir allir verið birtir opinberlega. Að baki þeim öllum liggur mikil vinna og fullur vilji yfirvalda til að standa rétt að öllum form- og efnisatriðum í samræmi við ákvörðun ESA frá 2010 þegar kerfið var samþykkt.

Ráðuneytið hefur í dag sent ESA ítarlega greinargerð þar sem farið er yfir forsendur á bak við hvern og einn fjárfestingarsamning ásamt rökstuðningi um að rétt hafi verið staðið að gerð þeirra. Ráðuneytið er bjartsýnt á að rannsókn ESA leiði það í ljós og vonar að rannsóknin taki sem skemmstan tíma, þ.a. allri óvissu verði eytt,“ segir í tilkynningu frá ráðuneytinu.

Þá segir ráðuneytið að áhrif þessarar ákvörðunar ESA sé sú að á meðan á rannsókn standi þurfi fyrirfram samþykki ESA áður en nýr fjárfestingarsamningur sem gerður er á grundvelli ívilnanalaganna tekur gildi.